ସ୍କନ୍ଦପୁରାଣ ଅଧ୍ୟାୟ ୨୫
ସ୍କନ୍ଦପୁରାଣ ଅଧ୍ୟାୟ ୨୫
ସନତ୍କୁମାର ଉବାଚ ।ତତସ୍ତତ୍ରାଗତାନ୍ଦେବାନ୍ଦେବତାଧିପତିର୍ଭବଃ ।ମରୁତଃ ପ୍ରାହ ସମ୍ପୂଜ୍ୟ କନ୍ୟାର୍ଥଂ ସଦସତ୍ପତିଃ ॥ 1 ॥ମରୁତୋ ଯେ ମହାବେଗା ମହାସତ୍ତ୍ୱା ମହୌଜସଃ ।ଆମନ୍ତ୍ର୍ୟ ନାମ୍ନା ତାନୀଶଃ ସଶକ୍ରଃ ସପିତାମହଃ ॥ 2 ॥ଯୁଷ୍ମାକଂ ସୁୟଶା କନ୍ୟା ସୁଭଗା ଦିବ୍ୟରୂପିଣୀ ।ଦାତୁମର୍ହଥ ତାଂ ସୁଭ୍ରୂଂ ସ୍ନୁଷାଂ ମହ୍ୟଂ ମହାବଲାଃ ॥ 3 ॥ମରୁତ ଊଚୁଃ ।ତ୍ୱମସ୍ମାକଂ ଚ ତସ୍ୟାଶ୍ଚ ସର୍ୱସ୍ୟ ଜଗତସ୍ତଥା ।ପ୍ରଭବିଷ୍ଣୁସ୍ତ୍ରିଲୋକେଶ ନ ତୁ ଯାଚିତୁମର୍ହସି ॥ 4 ॥ତ୍ୱୟୈବ ଦେୟା ଗ୍ରାହ୍ୟା ଚ ତ୍ୱଂ ନୋ ଗତିରନୁତ୍ତମା ।ମା ନଃ ପରାନିବେଶାନ ଯାଚନେନ ବିଭାବୟ ॥ 5 ॥ପିତା ନଃ କଶ୍ୟପଃ ଶ୍ରୀମାନ୍ମରୀଚିଶ୍ଚ ପିତାମହଃ ।ପିତାମହପିତା ବ୍ରହ୍ମା ତସ୍ୟାପି ତ୍ୱଂ ପିତାମହଃ ।ସ ତ୍ୱଂ ପିତାମହୋଽସ୍ମାକଂ ନ ପରାନ୍କର୍ତୁମର୍ହସି ॥ 6 ॥ସ ଏବମୁକ୍ତୋ ଦେବେଶୋ ମରୁଦ୍ଭିର୍ଦେବସତ୍ତମୈଃ ।ସୁୟଶାଂ ମରୁତାଂ କନ୍ୟାମାନୟାମାସ ତତ୍କ୍ଷଣାତ୍ ॥ 7 ॥ସ୍ୱୟଂ ହୋତାସ୍ୟ ତତ୍ରାସୀଦ୍ବ୍ରହ୍ମା ଲୋକପିତାମହଃ ।କଶ୍ୟପଶ୍ଚ ତଥୋଦ୍ଗାତା ଅତ୍ରିଃ ସାମ ସ୍ୱୟଂ ଜଗୌ ।ଅଥର୍ୱାଶ୍ଣ୍ଗିରସୌ ଦେବୌ ବ୍ରହ୍ମତ୍ୱମପି ଚକ୍ରତୁଃ ॥ 8 ॥ନାରଦଃ ପର୍ୱତଶ୍ଚୈବ ଚିତ୍ରସେନଶ୍ଚ ଗାୟନଃ ।ବିଶ୍ୱାବସୂ ରୁଚିଶ୍ଚୈବ ହାହା ହୂହୂ ତଥୈବ ଚ ॥ 9 ॥ତଥା ଶାଲିଶିରା ଯଶ୍ଚ ବିଶ୍ରୁତୋ ଗଣ୍ଡମଣ୍ଡକଃ ।ଈତିଶ୍ଚୈବେନ୍ଦ୍ରବାହଶ୍ଚ ଯଜ୍ଞବାହୋଽଥ ଦକ୍ଷିଣଃ ।ଏତେ ଚାନ୍ୟେ ଚ ଗନ୍ଧର୍ୱା ଜଗୁର୍ମଧୁରକଣ୍ଠିନଃ ॥ 10 ॥ଉର୍ୱଶୀ ଚୈବ ରମ୍ଭା ଚ ଘୃତାଚୀ ପୂର୍ୱଚିତ୍ତ୍ୟପି ।ତିଲୋତ୍ତମା ଚ ବିଶ୍ୱାଚୀ ଅନ୍ୟାଶ୍ଚାପ୍ସରସଃ ଶୁଭାଃ ।ଅନୃତ୍ୟନ୍ତ ମହାଭାଗା ନୃତ୍ତଂ ସୁରମନୋହରମ୍ ॥ 11 ॥ସନତ୍କୁମାର ଉବାଚ ।ସ ଏବମଭବଦ୍ୱ୍ୟାସ ବିବାହସ୍ତସ୍ୟ ଧୀମତଃ ।ନନ୍ଦିନୋ ଗଣମୁଖ୍ୟସ୍ୟ ଅନୌପମ୍ୟୋ ହ୍ୟନିନ୍ଦିତଃ ॥ 12 ॥ତତଃ ସ ତୁ କୃତୋଦ୍ୱାହୋ ନନ୍ଦୀ ଗତ୍ୱା ମହାମନାଃ ।ପାଦାନ୍ୱବନ୍ଦେ ଦେବସ୍ୟ ଦେବ୍ୟା ବ୍ରହ୍ମଣ ଏବ ଚ ।ଶିଲାଦସ୍ୟ ଚ ଲୋକେଶଃ ଶ୍ରିୟା ପରମୟା ଯୁତଃ ॥ 13 ॥ଦେବ ଉବାଚ ।ବରଂ ବୃଣୀଷ୍ୱ ପୁତ୍ର ତ୍ୱଂ ସ୍ନୁଷା ଚେୟଂ ତବ ପ୍ରିୟା ।ବରଂ ଦଦାମି ତେ ବତ୍ସ ଅନୟା ସହମୀପ୍ସିତମ୍ ॥ 14 ॥ନନ୍ଦ୍ୟୁବାଚ ।ଭଗବନ୍ୟଦି ତୁଷ୍ଟୋଽସି ତ୍ୱୟି ଭକ୍ତିର୍ଦୃଢାସ୍ତୁ ମେ ।ସଦା ଚ ତୁଷ୍ଟୋ ଭବ ମେ ସାମ୍ବଃ ସହ ଗଣେଶ୍ୱରୈଃ ॥ 15 ॥ପିତରଂ ଚୈବ ମେ ଦେବ ଉତ୍ପାଦକମିମଂ ପ୍ରଭୋ ।ଅନୁଗ୍ରହେଣ ଯୁକ୍ତେନ ଯୋକ୍ତୁମର୍ହସି କାମଦ ॥ 16 ॥ଦେବ ଉବାଚ ।ସଦାହଂ ତବ ନନ୍ଦୀଶ ସୁତୁଷ୍ଟଃ ସଗଣେଶ୍ୱରଃ ।ପାର୍ୱତ୍ୟା ସହିତୋ ଧୀମନ୍ନିଦଂ ଚ ଶୃଣୁ ମେ ବଚଃ ॥ 17 ॥ସଦେଷ୍ଟଶ୍ଚ ବରିଷ୍ଠଶ୍ଚ ପରମୈଶ୍ୱର୍ୟସଂୟୁତଃ ।ମହାୟୋଗୀ ମହେଷ୍ୱାସୋ ମହାବଲପରାକ୍ରମଃ ॥ 18 ॥ଅଜୟ୍ୟଶ୍ଚୈବ ଜେତା ଚ ପୂଜ୍ୟେଜ୍ୟଶ୍ଚ ସଦା ଭବ ।ଅହଂ ଯତ୍ର ଭବାଂସ୍ତତ୍ର ଯତ୍ର ତ୍ୱଂ ତତ୍ର ଚାପ୍ୟହମ୍ ॥ 19 ॥ଅୟଂ ଚ ତେ ପିତା ବିପ୍ରଃ ପରମୈଶ୍ୱର୍ୟସଂୟୁତଃ ।ଭବିଷ୍ୟତି ଗଣାଧ୍ୟକ୍ଷୋ ମହାଗଣପତିର୍ମମ ॥ 20 ॥ପର୍ୱତଂ ଚାସ୍ୟ ବୈଭ୍ରାଜଂ କାମଗଂ ସର୍ୱକାଞ୍ଚନମ୍ ।ଉପେତଂ ଭବନୈର୍ଦିବ୍ୟୈଃ ପ୍ରୟଚ୍ଛାମି ଜନାବୃତମ୍ ।ତେନାୟଂ ସର୍ୱଲୋକେଷୁ ଚରିଷ୍ୟତି ଯଥେପ୍ସିତମ୍ ॥ 21 ॥ସ୍ଥାନଂ ଶ୍ରୀପର୍ୱତେ ଚାସ୍ୟ ଭବିଷ୍ୟତି ସୁପୂଜିତମ୍ ।ଭୃଗୌ ତସ୍ମିଂଶ୍ଚ ଯଃ ପ୍ରାଣାଂସ୍ତ୍ୟକ୍ଷ୍ୟତେ ବୈ ସୁଧାର୍ମିକଃ ।ସ କାମଚାରୀ ବୈଭ୍ରାଜେ ଗଣପୋଽସ୍ୟ ଭବିଷ୍ୟତି ॥ 22 ॥ସନତ୍କୁମାର ଉବାଚ ।ତତୋ ଦେବୀ ମହାଭାଗା ଶୈଲାଦେରଦଦଦ୍ୱରମ୍ ।ସୋଽବ୍ରବୀତ୍ତ୍ୱୟି ଭକ୍ତିର୍ମେ ସଦୈବାନପଗା ଭବେତ୍ ॥ 23 ॥ତତୋ ମରୁତ୍ସୁତା ଚୈବ ଉଭାଭ୍ୟାମପି ଚୋଦିତା ।ବରଂ ବୃଣୁ ଯଥେଷ୍ଟଂ ବୈ ତାବିଦଂ ପ୍ରତ୍ୟୁବାଚ ହ ॥ 24 ॥ଯୁବୟୋରସ୍ତୁ ଭକ୍ତିର୍ମେ ତଥା ଭର୍ତରି ଚୈବ ହି ।ନିତ୍ୟଂ ଚାନପଗା ସ୍ୟାନ୍ମେ ଧର୍ମେ ଚ ମତିରୁତ୍ତମା ।ଏତଦିଚ୍ଛାମି ଦେବେଶୌ ବରଂ ବରସହସ୍ରଦୌ ॥ 25 ॥ସନତ୍କୁମାର ଉବାଚ ।ତତସ୍ତାବେବମେତତ୍ତେ ଭବିତେତି ଶୁଚିସ୍ମିତେ ।ଊଚତୁର୍ମୁଦିତୌ ଦେବୌ ସ୍ନୁଷାଂ ତାଂ ବରବର୍ଣିନୀମ୍ ॥ 26 ॥ଗଣାଶ୍ଚାସ୍ୟ ତତୋଽଭ୍ୟେତ୍ୟ ସର୍ୱେ ଦେବପ୍ରିୟେପ୍ସୟା ।ବରଂ ଦଦୁର୍ମହାସତ୍ତ୍ୱାଃ ସ ବବ୍ରେ କାଞ୍ଚନପ୍ରଭଃ ॥ 27 ॥ଯୁଷ୍ମାସୁ ମମ ଭକ୍ତିଶ୍ଚ ଐଶ୍ୱର୍ୟଂ ଚାପି ସମ୍ମତମ୍ ।ବଶ୍ୟାଶ୍ଚ ଯୂୟଂ ସର୍ୱେ ମେ ପ୍ରିୟୋ ଯୁଷ୍ମାକମେବ ଚ ॥ 28 ॥ଗଣା ଊଚୁଃ ।ଭବାନ୍ମନ୍ତାନୁମନ୍ତା ଚ ଗତିରାଗତିରେବ ଚ ।ଅସ୍ମାକମୀଶଃ ସର୍ୱେଷାଂ ଦେବାନାମପି ଚେଶ୍ୱରଃ ॥ 29 ॥କୁଷ୍ମାଣ୍ଡାନାଂ ବରିଷ୍ଠଶ୍ଚ ରୁଦ୍ରାଣାଂ ତ୍ୱଂ ମହାବଲଃ ।ଈତୀନାଂ ଦ୍ୱାରପାଲଶ୍ଚ ପ୍ରମଥାନାଂ ତଥୈବ ଚ ॥ 30 ॥ମହାବଲୋ ମହାୟୋଗୀ ସେନାନୀସ୍ତ୍ୱଂ ହି ନୋ ମତଃ ।ତ୍ୱଂ ଭୂତୋ ଭୂତନେତା ଚ ନାୟକୋଽଥ ବିନାୟକଃ ॥ 31 ॥ଗ୍ରହାଣାମଧିପଶ୍ଚୈବ ଉଗ୍ରଦଣ୍ଡଧରସ୍ତଥା ।ତ୍ୱମଗ୍ରୟୋଧୀ ଶତ୍ରୁଘ୍ନସ୍ତ୍ୱଂ ବୀରସ୍ତ୍ୱଂ ଦିବସ୍ପତିଃ ॥ 32 ॥ମହାନୁଭାବସ୍ତ୍ୱଂ ଚୈବ କ୍ଷୀରୋଦନିଲୟଶ୍ଚ ହ ।ଜପ୍ୟେଶ୍ୱରନିକେତଶ୍ଚ ଜପ୍ୟେଶ୍ୱରବିଭାବିତଃ ॥ 33 ॥ଭାବନଃ ସର୍ୱଭୂତାନାଂ ବରଦୋ ବରଦାର୍ଚିତଃ ।ଅସ୍ମାକଂ ବରଦଶ୍ଚୈବ ଭବ ଭୂତେଶ୍ୱର ପ୍ରଭୋ ॥ 34 ॥ସନତ୍କୁମାର ଉବାଚ ।ସ ଏବଂ ଗଣପୈଃ ସର୍ୱୈଃ ସ୍ତୁତୋ ନନ୍ଦୀଶ୍ୱରୋ ବିଭୁଃ ।ଉବାଚ ପ୍ରଣତଃ ସର୍ୱାନ୍ବ୍ରୂତ କିଂ କରବାଣି ବଃ ॥ 35 ॥ତ ଏବମୁକ୍ତା ଗଣପାଃ ସର୍ୱ ଏବ ମହାବଲାଃ ।ଊଚୁସ୍ତଂ ଦିବ୍ୟଭାବଜ୍ଞା ଦେବଦେବସ୍ୟ ସଂନିଧୌ ॥ 36 ॥ତ୍ୱମସ୍ମାକଂ ଗଣାଧ୍ୟକ୍ଷଃ କୃତୋ ଦେବେନ ଶମ୍ଭୁନା ।ଅସ୍ମାଭିଶ୍ଚାଭିଷିକ୍ତସ୍ତ୍ୱଂ ନାୟକୋ ଧର୍ମଦାୟକଃ ॥ 37 ॥ସ ତ୍ୱଂ ଶିବଶ୍ଚ ସୌମ୍ୟଶ୍ଚ ଗୁଣବାନଗୁଣେଷ୍ୱପି ।କ୍ଷମାଶୌଚଦମୋପେତୋ ଭବ ନଃ ପ୍ରିୟକୃତ୍ସଦା ॥ 38 ॥ସନତ୍କୁମାର ଉବାଚ ।ଏବମୁକ୍ତସ୍ତଦା ସର୍ୱାନ୍ପ୍ରଣମ୍ୟ ବହୁମାନତଃ ।ଶିରସ୍ୟଞ୍ଜଲିମାଧାୟ ଗଣପାନସ୍ତୁବତ୍ତଦା ॥ 39 ॥ନନ୍ଦ୍ୟୁବାଚ ।ନମୋ ବଃ ସର୍ୱଭୂତେଭ୍ୟୋ ନମୋ ଯୋଗିଭ୍ୟ ଏବ ଚ ।ନମଶ୍ଚାପ୍ୟନିକେତେଭ୍ୟୋ ଯୋଗୀଶେଭ୍ୟୋ ନମସ୍ତଥା ॥ 40 ॥ନମଃ କାମଚରେଭ୍ୟଶ୍ଚ ନମ ଉଗ୍ରେଭ୍ୟ ଏବ ଚ ।ମୃତ୍ୟୁଭ୍ୟଶ୍ଚ ଯମେଭ୍ୟଶ୍ଚ କାଲେଭ୍ୟଶ୍ଚ ନମୋ ନମଃ ॥ 41॥ନମଃ କାଞ୍ଚନମାଲେଭ୍ୟଃ ସର୍ୱଧର୍ମିଭ୍ୟ ଏବ ଚ ।ନମୋ ବୋ ବଧକେଭ୍ୟଶ୍ଚ ଅବଧ୍ୟେଭ୍ୟସ୍ତଥୈବ ଚ ॥ 42 ॥ନମଃ ପରମୟୋଗିଭ୍ୟୋ ଜଟିଭ୍ୟଶ୍ଚ ନମୋ ନମଃ ।ନମୋ ବୋଽଦୃଶ୍ୟରୂପେଭ୍ୟୋ ବିକୃତେଭ୍ୟସ୍ତଥୈବ ଚ ॥ 43 ॥ନମୋ ବଲ୍କଲବାସେଭ୍ୟଃ କୃତ୍ତିବାସେଭ୍ୟ ଏବ ଚ ।ନମଃ ଶ୍ୱେତାମ୍ବରସ୍ରଗ୍ଭ୍ୟଶ୍ଚିତ୍ରସ୍ରଗ୍ଭ୍ୟୋ ନମୋ ନମଃ ॥ 44 ॥ଧାବଦ୍ଭ୍ୟଶ୍ଚ ଦ୍ରବଦ୍ଭ୍ୟଶ୍ଚ ପ୍ରସ୍ଥିତେଭ୍ୟୋ ନମୋ ନମଃ ।ନମୋ ମୁନିଭ୍ୟୋ ଗାୟଦ୍ଭ୍ୟୋ ଜପଦ୍ଭ୍ୟଶ୍ଚ ନମୋ ନମଃ ॥ 45 ॥ନମଃ ଶରଭରୂପେଭ୍ୟଃ ଶତରୂପେଭ୍ୟ ଏବ ଚ ।ନମଃ ପର୍ୱତବାସେଭ୍ୟୋ ବ୍ୟାଘ୍ରରୂପେଭ୍ୟ ଏବ ଚ ॥ 46 ॥ନମୋ ମାର୍ଜାରରୂପେଭ୍ୟଃ କାକକୋକେଭ୍ୟ ଏବ ଚ ।ନମୋ ଦୈବତରୂପେଭ୍ୟଃ ପବନେଭ୍ୟସ୍ତଥୈବ ଚ ॥ 47 ॥ନମୋଽଗ୍ନିଭ୍ୟସ୍ତଥାଦ୍ଭ୍ୟଶ୍ଚ ବରୁଣେଭ୍ୟସ୍ତଥୈବ ଚ ।ନମୋ ଧନେଶରୂପେଭ୍ୟଃ ସର୍ୱରୂପିଭ୍ୟ ଏବ ଚ ॥ 48 ॥ନମଶ୍ଚୋଦରବକ୍ତ୍ରେଭ୍ୟଃ ସର୍ୱବକ୍ତ୍ରେଭ୍ୟ ଏବ ଚ ।ନମୋ ବାମନରୂପେଭ୍ୟୋ ବାମରୂପେଭ୍ୟ ଏବ ଚ ॥ 49 ॥ଦେବାସୁରମନୁଷ୍ୟାଣାମାପ୍ୟାୟିଭ୍ୟୋ ନମୋ ନମଃ ।ନମୋ ବଃ ସର୍ୱଭୂତାନାଂ ନମୋ ବଃ ସର୍ୱତଃ ଶୁଭାଃ ॥ 50 ॥ଗ୍ରହେଭ୍ୟଶ୍ଚ ନମୋ ବୋଽସ୍ତୁ ମୋକ୍ଷେଭ୍ୟଶ୍ଚ ନମସ୍ତଥା ।ଶୁଭେଭ୍ୟଶ୍ଚ ନମୋ ବୋଽସ୍ତୁ ଅଶୁଭେଭ୍ୟସ୍ତଥୈବ ଚ ।ମମ ସୌମ୍ୟାଃ ଶିବାଶ୍ଚୈବ ଭବନ୍ତୁ ଗଣନାୟକାଃ ॥ 51 ॥ଇତି ସ୍ତୁତା ଗଣପତୟୋ ମହାବଲାଃ ଶୁଭୈର୍ୱଚୋଭିଃ ସୁରଶତ୍ରୁନାଶନାଃ ।ଦିଶନ୍ତୁ ମେ ସୁଖମତୁଲଂ ସୁଖପ୍ରଦା ବଲଂ ଚ ବୀର୍ୟଂ ସ୍ଥିରତାଂଚ ସଂୟୁଗେ ॥ 52 ॥ତପୋଽକ୍ଷୟଂ ସ୍ଥାନମଥାତୁଲାଂ ଗତିଂ ଯଶସ୍ତଥାଗ୍ର୍ୟଂ ବହୁଧର୍ମନିତ୍ୟତାମ୍ ।ଦିଶନ୍ତୁ ସର୍ୱଂ ମନସେପ୍ସିତଂ ଚ ମେ ସୁରେଶ୍ୱରାଃ ପୁଷ୍ଟିମନୁତ୍ତମାଂତଥା ॥ 53 ॥ସନତ୍କୁମାର ଉବାଚ ।ଇମୌ ନନ୍ଦିଗଣେନ୍ଦ୍ରାଣାଂ ସ୍ତବୌ ଯୋଽଧ୍ୟେତି ନିତ୍ୟଶଃ ।ସୋଽଶ୍ୱମେଧାବଭୃଥବତ୍ସର୍ୱପାପୈଃ ପ୍ରମୁଚ୍ୟତେ ॥ 54 ॥ସନ୍ଧ୍ୟାୟାମପରସ୍ୟାଂ ତୁ ଜପନ୍ପାପଂ ଦିବାକୃତମ୍ ।ପୂର୍ୱସ୍ୟାଂ ସନ୍ତ୍ୟଜେଦ୍ୱାପି ସର୍ୱରାତ୍ରିକୃତଂ ଜପନ୍ ॥ 55 ॥ସନତ୍କୁମାର ଉବାଚ ।ତତସ୍ତେ ଗଣପାଃ ସର୍ୱେ ସଂସ୍ତୁତାସ୍ତେନ ଧୀମତା ।ନିସୃଷ୍ଟାଶ୍ଚ ତଦା ଜଗ୍ମୁଃ ପ୍ରଣିପତ୍ୟ ବୃଷଧ୍ୱଜମ୍ ॥ 56 ॥ଦେବାଶ୍ଚ ସର୍ୱଲୋକାଶ୍ଚ ତତୋ ଦେବଃ ସ୍ୱୟଂ ପ୍ରଭୁଃ ।ସୃଷ୍ଟ୍ୱା ନନ୍ଦୀଶ୍ୱରଗୃହଂ ପ୍ରଦାୟ ଚ ମହାମନାଃ ।ଈପ୍ସିତଂ ସହ ଦେବ୍ୟା ବୈ ଜଗାମ ସ୍ଥାନମବ୍ୟଯମ୍ ॥ 57 ॥ଯ ଇମଂ ନନ୍ଦିନୋ ଜନ୍ମ ବରଦାନଂ ତଥୈବ ଚ ।ଅଭିଷେକଂ ବିବାହଂ ଚ ପଠେଦ୍ୱା ଶ୍ରାବୟୀତ ବା ।ବ୍ରାହ୍ମଣଃ ସ ମୃତୋ ଯାତି ନନ୍ଦୀଶ୍ୱରସଲୋକତାମ୍ ॥ 58 ॥ଯୋ ନିୟତସ୍ତୁ ପଠେତ୍ପ୍ରୟତାତ୍ମା ସର୍ୱମିମଂ ପ୍ରଣତୋ ଭବଭକ୍ତ୍ୟା ।ସୋଽପି ଗତଃ ପରଲୋକବିଚାରୀ ନନ୍ଦିସମୋଽନୁଚରୋ ହି ମମ ସ୍ୟାତ୍ ॥ 59 ॥ଇତି ସ୍କନ୍ଦପୁରାଣେ ପଞ୍ଚବିଂଶତିମୋଽଧ୍ୟାୟଃ ॥ 25 ॥
अहमेबासमेबाग्रे नान्यत् यत् सदसत् ।पश्चादहं यदेतच्च योऽबशिष्येत सोऽस्म्यहम् ॥ऋतेऽर्थँ यत् प्रतीयेत न प्रतीयेत चात्मनि ।तद्बिद्यादात्मनो मायां यथाऽऽभासो यथा तमः ॥यथा महान्ति भूतानि भूतेषूच्चाबचेष्वनु ।प्रबिष्टान्यप्रबिष्टनि तथा तेषु न तेष्वहम् ॥एतावदेब जिज्ञास्यं तत्त्वजिज्ञासुनाऽत्मनः ।अन्वयब्यतिरेकाभ्यां यत् स्यात् सर्वत्र सर्वदा ॥(श्रीमद्भागवत, 2/9/32-35)
Comments
Post a Comment