ସ୍କନ୍ଦପୁରାଣ ଅଧ୍ୟାୟ ୧୦

 ସ୍କନ୍ଦପୁରାଣ ଅଧ୍ୟାୟ ୧୦

ସନତ୍କୁମାର ଉବାଚ । 

ସା ଦେବୀ ତ୍ର୍ୟମ୍ବକପ୍ରୋକ୍ତା ତତାପ ସୁଚିରଂ ତପଃ ।

ନିରାହାରା କଦାଚିଚ୍ଚ ଏକପର୍ଣାଶନା ପୁନଃ ।

ବାୟ୍ୱାହାରା ପୁନଶ୍ଚାପି ଅବ୍ଭକ୍ଷା ଭୂୟ ଏବ ଚ ॥ 1 ॥

ତାଂ ତପଶ୍ଚରଣେ ଯୁକ୍ତାଂ ବ୍ରହ୍ମା ଜ୍ଞାତ୍ୱାତିଭାସ୍ୱରାମ୍ ।

ଉବାଚ ବ୍ରୂହି ତୁଷ୍ଟୋଽସ୍ମି ଦେବି କିଂ କରବାଣି ତେ ॥ 2 ॥

ସାବ୍ରବୀତ୍ ତ୍ର୍ୟମ୍ବକଂ ଦେବଂ ପତିଂ ପ୍ରାପ୍ୟେନ୍ଦୁବର୍ଚସମ୍ ।

ବିଚରେୟଂ ସୁଖଂ ଦେବ ସର୍ୱା/ଲ୍ଲୋକାନ୍ନମସ୍ତବ ॥ 3 ॥

 

ବ୍ରହ୍ମୋବାଚ । 

ନ ହି ଯେନ ଶରୀରେଣ କ୍ରିୟତେ ପରମଂ ତପଃ ।

ତେନୈବ ପରମେଶୋଽସୌ ପତିଃ ଶମ୍ଭୁରବାପ୍ୟତେ ॥ 4 ॥

ତସ୍ମାଦ୍ଧି ଯୋଗାଦ୍ଭବତୀ ଦକ୍ଷସ୍ୟେହ ପ୍ରଜାପତେଃ ।

ଜାୟସ୍ୱ ଦୁହିତା ଭୂତ୍ୱା ପତିଂ ରୁଦ୍ରମବାପ୍ସ୍ୟସି ॥ 5 ॥

ତତଃ ସା ତଦ୍ୱଚଃ ଶ୍ରୁତ୍ୱା ଯୋଗାଦ୍ଦେବୀ ମନସ୍ୱିନୀ ।

ଦକ୍ଷସ୍ୟ ଦୁହିତା ଜଜ୍ଞେ ସତୀ ନାମାତିୟୋଗିନୀ ॥ 6 ॥

ତାଂ ଦକ୍ଷସ୍ତ୍ର୍ୟମ୍ବକାୟୈବ ଦଦୌ ଭାର୍ୟାମନିନ୍ଦିତାମ୍ ।

ବ୍ରହ୍ମଣୋ ବଚନାଦ୍ୟସ୍ୟାଂ ମାନସାନସୃଜତ୍ସୁତାନ୍ ॥ 7 ॥

ଆତ୍ମତୁଲ୍ୟବଲାନ୍ଦୀପ୍ତାଞ୍ଜରାମରଣବର୍ଜିତାନ୍ ।

ଅନେକାନି ସହସ୍ରାଣି ରୁଦ୍ରାଣାମମିତୌଜସାମ୍ ॥ 8 ॥

ତାନ୍ଦୃଷ୍ଟ୍ୱା ସୃଜ୍ୟମାନାଂଶ୍ଚ ବ୍ରହ୍ମା ତଂ ପ୍ରତ୍ୟଷେଧୟତ୍ ।

ମା ସ୍ରାକ୍ଷୀର୍ଦେବଦେବେଶ ପ୍ରଜା ମୃତ୍ୟୁବିବର୍ଜିତାଃ ॥ 9 ॥

ଅନ୍ୟାଃ ସୃଜସ୍ୱ ଭଦ୍ରଂ ତେ ପ୍ରଜା ମୃତ୍ୟୁସମନ୍ୱିତାଃ ।

ତେନ ଚୋକ୍ତଂ ସ୍ଥିତୋଽସ୍ମୀତି ସ୍ଥାଣୁସ୍ତେନ ତତଃ ସ୍ମୃତଃ ॥ 10 ॥

 

ଦେବ ଉବାଚ ।

ନ ସ୍ରକ୍ଷ୍ୟେ ମୃତ୍ୟୁସଂୟୁକ୍ତାଃ ପ୍ରଜା ବ୍ରହ୍ମନ୍କଥଞ୍ଚନ ।

ସ୍ଥିତୋଽସ୍ମି ବଚନାତ୍ତେଽଦ୍ୟ ବକ୍ତବ୍ୟୋ ନାସ୍ମି ତେ ପୁନଃ ॥ 11 ॥

ଯେ ତ୍ୱିମେ ମାନସାଃ ସୃଷ୍ଟା ମହାତ୍ମାନୋ ମହାବଲାଃ ।

ଚରିଷ୍ୟନ୍ତି ମୟା ସାର୍ଧଂ ସର୍ୱ ଏତେ ହି ଯାଜ୍ଞିକାଃ ॥ 12 ॥

 

ସନତ୍କୁମାର ଉବାଚ ।

ଅଥ କାଲେ ଗତେ ବ୍ୟାସ ସ ଦକ୍ଷଃ ଶାପକାରଣାତ୍ ।

ଅନ୍ୟାନାହୂୟ ଜାମାତ୍।ର଼୍ନ୍ସଦାରାନର୍ଚୟଦ୍ଗୃହେ ॥ 13 ॥

ସତୀଂ ସହ ତ୍ର୍ୟମ୍ବକେନ ନାଜୁହାବ ରୁଷାନ୍ୱିତଃ ।

ସତୀ ଜ୍ଞାତ୍ୱା ତୁ ତତ୍ସର୍ୱଂ ଗତ୍ୱା ପିତରମବ୍ରବୀତ୍ ॥ 14 ॥

ଅହଂ ଜ୍ୟେଷ୍ଠା ବରିଷ୍ଠା ଚ ଜାମାତ୍ରା ସହ ସୁବ୍ରତ ।

ମାଂ ହିତ୍ୱା ନାର୍ହସେ ହ୍ୟେତାଃ ସହ ଭର୍ତୃଭିରର୍ଚିତୁମ୍ ॥ 15 ॥

କ୍ରୋଧେନାଥ ସମାବିଷ୍ଟଃ ସ କ୍ରୋଧୋପହତେନ୍ଦ୍ରିୟଃ ।

ନିରୀକ୍ଷ୍ୟ ପ୍ରାବ୍ରବୀଦ୍ଦକ୍ଷଶ୍ଚକ୍ଷୁଷା ନିର୍ଦହନ୍ନିବ ॥ 16 ॥

ମାମେତାଃ ସତି ସସ୍ନେହାଃ ପୂଜୟନ୍ତି ସଭର୍ତୃକାଃ ।

ନ ତ୍ୱଂ ତଥା ପୂଜୟସେ ସହ ଭର୍ତ୍ରା ମହାବ୍ରତେ ॥ 17 ॥

ଗୃହାଂଶ୍ଚ ମେ ସପତ୍ନୀକାଃ ପ୍ରବିଶନ୍ତି ତପୋଧନାଃ ।

ଶ୍ରେଷ୍ଠାଂସ୍ତସ୍ମାତ୍ସଦା ମନ୍ୟେ ତତସ୍ତାନର୍ଚୟାମ୍ୟହମ୍ ॥ 18 ॥

ତସ୍ମାଦ୍ୟତ୍ତେ କରୋମ୍ୟଦ୍ୟ ଶୁଭଂ ବା ଯଦି ବାଶୁଭମ୍ ।

ପୂଜାଂ ଗୃହାଣ ତାଂ ପୁତ୍ରି ଗଚ୍ଛ ବା ଯତ୍ର ରୋଚତେ ॥ 19 ॥

 

ସନତ୍କୁମାର ଉବାଚ ।

ତତଃ ସା କ୍ରୋଧଦୀପ୍ତାସ୍ୟା ନ ଜଗ୍ରାହାତିକୋପିତା ।

ପୂଜାମସମ୍ମତାଂ ହୀନାମିଦଂ ଚୋବାଚ ତଂ ଶୁଭା ॥ 20  ॥

ଯସ୍ମାଦସମ୍ମତାମେତାଂ ପୂଜାଂ ତ୍ୱଂ କୁରୁଷେ ମୟି ।

ଶ୍ଲାଘ୍ୟାଂ ଚୈବାପ୍ୟଦୁଷ୍ଟାଂ ଚ ଶ୍ରେଷ୍ଠାଂ ମାଂ ଗର୍ହସେ ପିତଃ ॥ 21॥

ତସ୍ମାଦିମଂ ସ୍ୱକଂ ଦେହଂ ତ୍ୟଜାମ୍ୟେଷା ତବାତ୍ମଜା ।

ଅସତ୍କୃତାୟାଃ କିଂ ମେଽଦ୍ୟ ଜୀବିତେନାଶୁଭେନ ହ ॥ 22 ॥

 

ସନତ୍କୁମାର ଉବାଚ ।

ତତଃ କୃତ୍ୱା ନମସ୍କାରଂ ମନସା ତ୍ର୍ୟମ୍ବକାୟ ହ ।

ଉବାଚେଦଂ ସୁସଂରବ୍ଧା ବଚନଂ ବଚନାରଣିଃ ॥ 23 ॥

ଯତ୍ରାହମୁପପଦ୍ୟେୟଂ ପୁନର୍ଦେହେ ସ୍ୱୟେଚ୍ଛୟା ।

ଏବଂ ତତ୍ରାପ୍ୟସମ୍ମୂଢା ସମ୍ଭୂତା ଧାର୍ମିକା ସତୀ ।

ଗଚ୍ଛେୟଂ ଧର୍ମପତ୍ନୀତ୍ୱଂ ତ୍ର୍ୟମ୍ବକସ୍ୟୈବ ଧୀମତଃ ॥ 24 ॥

ତତଃ ସା ଧାରଣାଂ କୃତ୍ୱା ଆଗ୍ନେୟୀଂ ସହସା ସତୀ ।

ଦଦାହ ବୈ ସ୍ୱକଂ ଦେହଂ ସ୍ୱସମୁତ୍ଥେନ ବହ୍ନିନା ॥ 25 ॥

ତାଂ ଜ୍ଞାତ୍ୱା ତ୍ର୍ୟମ୍ବକୋ ଦେବୀଂ ତଥାଭୂତାଂ ମହାୟଶାଃ ।

ଉବାଚ ଦକ୍ଷଂ ସଙ୍ଗମ୍ୟ ଇଦଂ ବଚନକୋବିଦଃ ॥ 26 ॥

ଯସ୍ମାତ୍ତେ ନିନ୍ଦିତଶ୍ଚାହଂ ପ୍ରଶସ୍ତାଶ୍ଚେତରେ ପୃଥକ୍ ।

ଜାମାତରଃ ସପତ୍ନୀକାସ୍ତସ୍ମାଦ୍ୱୈବସ୍ୱତେଽନ୍ତରେ ।

ଉତ୍ପତ୍ସ୍ୟନ୍ତେ ପୁନର୍ୟଜ୍ଞେ ତବ ଜାମାତରସ୍ତ୍ୱିମେ ॥ 27 ॥

ତ୍ୱଂ ଚୈବ ମମ ଶାପେନ କ୍ଷତ୍ରିୟୋ ଭବିତା ନୃପଃ ।

ପ୍ରଚେତସାଂ ସୁତଶ୍ଚୈବ କନ୍ୟାୟାଂ ଶାଖିନାଂ ପୁନଃ ।

ଧର୍ମବିଘ୍ନଂ ଚ ତେ ତତ୍ର କରିଷ୍ୟେ କ୍ରୂରକର୍ମଣଃ ॥ 28 ॥

 

ସନତ୍କୁମାର ଉବାଚ ।

ତମୁବାଚ ତଦା ଦକ୍ଷୋ ଦୂୟତା ହୃଦୟେନ ବୈ ।

ମୟା ଯଦି ସୁତା ସ୍ୱା ବୈ ପ୍ରୋକ୍ତା ତ୍ୟକ୍ତାପି ବା ପୁନଃ ।

କିଂ ତବାତ୍ର କୃତଂ ଦେବ ଅହଂ ତସ୍ୟାଃ ପ୍ରଭୁଃ ସଦା ॥ 29 ॥

ଯସ୍ମାତ୍ତ୍ୱଂ ମାମଭ୍ୟଶପସ୍ତସ୍ମାତ୍ତ୍ୱମପି ଶଙ୍କର ।

ଭୂର୍ଲୋକେ ବତ୍ସ୍ୟସେ ନିତ୍ୟଂ ନ ସ୍ୱର୍ଲୋକେ କଦାଚନ ॥ 30 ॥

ଭାଗଂ ଚ ତବ ଯଜ୍ଞେଷୁ ଦତ୍ତ୍ୱା ସର୍ୱେ ଦ୍ୱିଜାତୟଃ ।

ଅପଃ ସ୍ପ୍ରକ୍ଷ୍ୟନ୍ତି ସର୍ୱତ୍ର ମହାଦେବ ମହାଦ୍ୟୁତେ ॥ 31 ॥

 

ସନତ୍କୁମାର ଉବାଚ ।

ତତଃ ସ ଦେବଃ ପ୍ରହସଂସ୍ତମୁବାଚ ତ୍ରିଲୋଚନଃ ।

ସର୍ୱେଷାମେବ ଲୋକାନାଂ ମୂଲଂ ଭୂର୍ଲୋକ ଉଚ୍ୟତେ ॥ 32 ॥

ତମହଂ ଧାରୟାମ୍ୟେକୋ ଲୋକାନାଂ ହିତକାମ୍ୟଯା ।

ଭୂର୍ଲୋକେ ହି ଧୃତେ ଲୋକାଃ ସର୍ୱେ ତିଷ୍ଠନ୍ତି ଶାଶ୍ୱତାଃ ।

ତସ୍ମାତ୍ତିଷ୍ଠାମ୍ୟହଂ ନିତ୍ୟମିହୈବ ନ ତବାଜ୍ଞୟା ॥ 33 ॥

ଭାଗାନ୍ଦତ୍ତ୍ୱା ତଥାନ୍ୟେଭ୍ୟୋ ଦିତ୍ସବୋ ମେ ଦ୍ୱିଜାତୟଃ ।

ଅପଃ ସ୍ପୃଶନ୍ତି ଶୁଦ୍ଧ୍ୟର୍ଥଂ ଭାଗଂ ଯଚ୍ଛନ୍ତି ମେ ତତଃ ।

ଦତ୍ତ୍ୱା ସ୍ପୃଶନ୍ତି ଭୂୟଶ୍ଚ ଧର୍ମସ୍ୟୈବାଭିବୃଦ୍ଧୟେ ॥ 34 ॥

ଯଥା ହି ଦେବନିର୍ମାଲ୍ୟଂ ଶୁଚୟୋ ଧାରୟନ୍ତ୍ୟୁତ ।

ଅଶୁଚିଂ ସ୍ପ୍ରଷ୍ଟୁକାମାଶ୍ଚ ତ୍ୟକ୍ତ୍ୱାପଃ ସଂସ୍ପୃଶନ୍ତି ଚ ॥ 35 ॥

ଦେବାନାମେବମନ୍ୟେଷାଂ ଦିତ୍ସବୋ ବ୍ରାହ୍ମଣର୍ଷଭାଃ ।

ଭାଗାନପଃ ସ୍ପୃଶନ୍ତି ସ୍ମ ତତ୍ର କା ପରିଦେବନା ॥ 36 ॥

ତ୍ୱଂ ତୁ ମଚ୍ଛାପନିର୍ଦଗ୍ଧୋ ବିପରୀତୋ ନରାଧମଃ ।

ସ୍ୱସ୍ୟାଂ ସୁତାୟାଂ ମୂଢାତ୍ମା ପୁତ୍ରମୁତ୍ପାଦୟିଷ୍ୟସି ॥ 37 ॥

 

ସନତ୍କୁମାର ଉବାଚ ।

ଏବଂ ସ ଭଗବାଞ୍ଛପ୍ତ୍ୱା ଦକ୍ଷଂ ଦେବୋ ଜଗତ୍ପତିଃ ।

ବିରରାମ ମହାତେଜା ଜଗାମ ଚ ଯଥାଗତମ୍ ॥ 38 ॥

ଚନ୍ଦ୍ରଦିବାକରବହ୍ନିସମାକ୍ଷଂ ଚନ୍ଦ୍ରନିଭାନନପଦ୍ମଦଲାକ୍ଷମ୍ ।

ଗୋବୃଷବାହମମେୟଗୁଣୌଘଂ ସତତମିହେନ୍ଦୁବହଂ ପ୍ରଣତାଃ ସ୍ମଃ ॥ 39 ॥

ଯ ଇମଂ ଦକ୍ଷଶାପାଶ୍ଣ୍କଂ ଦେବ୍ୟାଶ୍ଚୈବାଶରୀରତାମ୍ ।

ଶୃଣୁୟାଦ୍ୱାଥ ବିପ୍ରାନ୍ୱା ଶ୍ରାବୟୀତ ଯତବ୍ରତଃ ।

ସର୍ୱପାପବିନିର୍ମୁକ୍ତୋ ରୁଦ୍ରଲୋକମବାପ୍ନୁୟାତ୍ ॥ 40 ॥

 

ଇତି ସ୍କନ୍ଦପୁରାଣେ ଦଶମୋଽଧ୍ୟାୟଃ ॥ 10 ॥

Click Link 👇Next ଅଧ୍ୟାୟ

https://skand-puran.blogspot.com/2024/11/SkandPuranA11.html

ସ୍କନ୍ଦପୁରାଣ Pdf 👇odia

https://archive.org/details/skanda-purana-utkala-khanda-/page/%E0%AD%A7%E0%AD%AC%E0%AD%A9/mode/1up