ସ୍କନ୍ଦପୁରାଣ ଅଧ୍ୟାୟ ୩

 ସ୍କନ୍ଦପୁରାଣ ଅଧ୍ୟାୟ ୩

ସନତ୍କୁମାର ଉବାଚ ।

ଶୃଣୁଷ୍ୱେମାଂ କଥାଂ ଦିବ୍ୟାଂ ସର୍ୱପାପପ୍ରଣାଶନୀମ୍ ।

କଥ୍ୟମାନାଂ ମୟା ଚିତ୍ରାଂ ବହ୍ୱର୍ଥାଂ ଶ୍ରୁତିସମ୍ମିତାମ୍ ।

ଯାଂ ଶ୍ରୁତ୍ୱା ପାପକର୍ମାପି ଗଚ୍ଛେଚ୍ଚ ପରମାଂ ଗତିମ୍ ॥ 1 ॥

ନ ନାସ୍ତିକାଶ୍ରଦ୍ଦଧାନେ ଶଠେ ଚାପି କଥଞ୍ଚନ ।

ଇମାଂ କଥାମନୁବ୍ରୂୟାତ୍ତଥା ଚାସୂୟକେ ନରେ ॥ 2 ॥

ଇଦଂ ପୁତ୍ରାୟ ଶିଷ୍ୟାୟ ଧାର୍ମିକାୟାନସୂୟବେ ।

କଥନୀୟଂ ମହାବ୍ରହ୍ମନ୍ଦେବଭକ୍ତାୟ ବା ଭବେତ୍ ।

କୁମାରଭକ୍ତାୟ ତଥା ଶ୍ରଦ୍ଦଧାନାୟ ଚୈବ ହି ॥ 3 ॥

ପୁରା ବ୍ରହ୍ମା ପ୍ରଜାଧ୍ୟକ୍ଷଃ ଅଣ୍ଡେଽସ୍ମିନ୍ସମ୍ପ୍ରସୂୟତେ ।

ସୋଽଜ୍ଞାନାତ୍ପିତରଂ ବ୍ରହ୍ମା ନ ବେଦ ତମସାବୃତଃ ॥ 4 ॥

ଅହମେକ ଇତି ଜ୍ଞାତ୍ୱା ସର୍ୱା/ଲ୍ଲୋକାନବୈକ୍ଷତ ।

ନ ଚାପଶ୍ୟତ ତତ୍ରାନ୍ୟଂ ତପୋୟୋଗବଲାନ୍ୱିତଃ ॥ 5 ॥

ପୁତ୍ର ପୁତ୍ରେତି ଚାପ୍ୟୁକ୍ତୋ ବ୍ରହ୍ମା ଶର୍ୱେଣ ଧୀମତା ।

ପ୍ରଣତଃ ପ୍ରାଞ୍ଜଲିର୍ଭୂତ୍ୱା ତମେବ ଶରଣଂ ଗତଃ ॥ 6 ॥

ସ ଦତ୍ତ୍ୱା ବ୍ରହ୍ମଣେ ଶମ୍ଭୁଃ ସ୍ରଷ୍ଟୃତ୍ୱଂ ଜ୍ଞାନସଂହିତମ୍ ।

ବିଭୁତ୍ୱଂ ଚୈବ ଲୋକାନାମନ୍ତର୍ଧେ ପରମେଶ୍ୱରଃ ॥ 7 ॥

ତଦେଷୋପନିଷତ୍ପ୍ରୋକ୍ତା ମୟା ବ୍ୟାସ ସନାତନା ।

ଯାଂ ଶ୍ରୁତ୍ୱା ଯୋଗିନୋ ଧ୍ୟାନାତ୍ପ୍ରପଦ୍ୟନ୍ତେ ମହେଶ୍ୱରମ୍ ॥ 8 ॥

ବ୍ରହ୍ମଂ ଚ ଯୋ ବିଦଧେ ପୁତ୍ରମଗ୍ରେ ଜ୍ଞାନଂ ଚ

ଯଃ ପ୍ରହିଣୋତି ସ୍ମ ତସ୍ମୈ ।

ତମାତ୍ମସ୍ଥଂ ଯେଽନୁପଶ୍ୟନ୍ତି ଧୀରାସ୍ତେଷାଂ

ଶାନ୍ତିଃ ଶାଶ୍ୱତୀ ନେତରେଷାମ୍ ॥ 9 ॥

ସ ବ୍ୟାସ ପିତରଂ ଦୃଷ୍ଟ୍ୱା ସ୍ୱଦୀପ୍ତ୍ୟା ପରୟା ଯୁତମ୍ ।

ପୁତ୍ରକାମଃ ପ୍ରଜାହେତୋସ୍ତପସ୍ତୀବ୍ରଂ ଚକାର ହ ॥ 10 ॥

ମହତା ଯୋଗତପସା ଯୁକ୍ତସ୍ୟ ସୁମହାତ୍ମନଃ ।

ଅଚିରେଣୈବ କାଲେନ ପିତା ସମ୍ପ୍ରତୁତୋଷ ହ ॥ 11 ॥

ଦର୍ଶନଂ ଚାଗମତ୍ତସ୍ୟ ବରଦୋଽସ୍ମୀତ୍ୟୁବାଚ ହ ।

ସ ତୁଷ୍ଟାବ ନତୋ ଭୂତ୍ୱା କୃତ୍ୱା ଶିରସି ଚାଞ୍ଜଲିମ୍ ॥ 12 ॥

ନମଃ ପରମଦେବାୟ ଦେବାନାମପି ବେଧସେ ।

ସ୍ରଷ୍ଟ୍ରେ ବୈ ଲୋକତନ୍ତ୍ରାୟ ବ୍ରହ୍ମଣଃ ପତୟେ ନମଃ ॥ 13 ॥

ଏକସ୍ମୈ ଶକ୍ତିୟୁକ୍ତାୟ ଅଶକ୍ତିରହିତାୟ ଚ ।

ଅନନ୍ତାୟାପ୍ରମେୟାୟ ଇନ୍ଦ୍ରିୟାବିଷୟାୟ ଚ ॥ 14 ॥

ବ୍ୟାପିନେ ବ୍ୟାପ୍ତପୂର୍ୱାୟ ଅଧିଷ୍ଠାତ୍ରେ ପ୍ରଚୋଦିନେ ।

କୃତପ୍ରଚେତନାୟୈବ ତତ୍ତ୍ୱବିନ୍ୟାସକାରିଣେ ॥ 15 ॥

ପ୍ରଧାନଚୋଦକାୟୈବ ଗୁଣିନାଂ ଶାନ୍ତିଦାୟ ଚ ।

ଦୃଷ୍ଟିଦାୟ ଚ ସର୍ୱେଷାଂ ସ୍ୱୟଂ ବୈ ଦର୍ଶନାୟ ଚ ॥ 16 ॥

ବିଷୟଗ୍ରାହିଣେ ଚୈବ ନିୟମସ୍ୟ ଚ କାରିଣେ ।

ମନସଃ କରଣାନାଂ ଚ ତତ୍ରୈବ ନିୟମସ୍ୟ ଚ ॥ 17 ॥

ଭୂତାନାଂ ଗୁଣକର୍ତ୍ରେ ଚ ଶକ୍ତିଦାୟ ତଥୈବ ଚ ।

କର୍ତ୍ରେ ହ୍ୟଣ୍ଡସ୍ୟ ମହ୍ୟଂ ଚ ଅଚିନ୍ତ୍ୟାୟାଗ୍ରଜାୟ ଚ ।

ଅପ୍ରମେୟ ପିତର୍ନିତ୍ୟଂ ପ୍ରୀତୋ ନୋ ଦିଶ ଶକ୍ୱରୀମ୍ ॥ 18 ॥

ତସ୍ୟୈବଂ ସ୍ତୁବତୋ ବ୍ୟାସ ଦେବଦେବୋ ମହେଶ୍ୱରଃ ।

ତୁଷ୍ଟୋଽବ୍ରବୀତ୍ସ୍ୱୟଂ ପୁତ୍ରଂ ବ୍ରହ୍ମାଣଂ ପ୍ରଣତଂ ତଥା ॥ 19 ॥

ଯସ୍ମାତ୍ତେ ବିଦିତଂ ବତ୍ସ ସୂକ୍ଷ୍ମମେତନ୍ମହାଦ୍ୟୁତେ ।

ତସ୍ମାଦ୍ବ୍ରହ୍ମେତି ଲୋକେଷୁ ନାମ୍ନା ଖ୍ୟାତିଂ ଗମିଷ୍ୟସି ॥ 20 ॥

ଯସ୍ମାଚ୍ଚାହଂ ପିତେତ୍ୟୁକ୍ତସ୍ତ୍ୱୟା ବୁଦ୍ଧିମତାଂ ବର ।

ତସ୍ମାତ୍ପିତାମହତ୍ୱଂ ତେ ଲୋକେ ଖ୍ୟାତିଂ ଗମିଷ୍ୟତି ॥ 21 ॥

ପ୍ରଜାର୍ଥଂ ଯଚ୍ଚ ତେ ତପ୍ତଂ ତପ ଉଗ୍ରଂ ସୁଦୁଶ୍ଚରମ୍ ।

ତସ୍ମାତ୍ପ୍ରଜାପତିତ୍ୱଂ ତେ ଦଦାନି ପ୍ରୟତାତ୍ମନେ ॥ 22 ॥

ଏବମୁକ୍ତ୍ୱା ସ ଦେବେଶୋ ମୂର୍ତିମତ୍ୟୋଽସୃଜତ୍ସ୍ତ୍ରିୟଃ ।

ଯାସ୍ତାଃ ପ୍ରକୃତୟସ୍ତ୍ୱଷ୍ଟୌ ବିଶେଷାଶ୍ଚେନ୍ଦ୍ରିୟୈଃ ସହ ।

ଭାବାଶ୍ଚ ସର୍ୱେ ତେ ଦେବମୁପତସ୍ଥୁଃ ସ୍ୱରୂପିଣଃ ॥ 23 ॥

ତାନୁବାଚ ତତୋ ଦେବଃ ପତିର୍ୟୁକ୍ତଃ ସ୍ୱତେଜସା ।

ଏତମଦ୍ୟାଭିଷେକେଣ ସମ୍ପାଦୟତ ମା ଚିରମ୍ ॥ 24 ॥

ତାଭିଃ ସ୍ୱଂ ସ୍ୱଂ ସମାଦାୟ ଭାବଂ ଦିବ୍ୟମତର୍କିତମ୍ ।

ଅଭିଷିକ୍ତୋ ବଭୂବେତି ପ୍ରଜାପତିରତିଦ୍ୟୁତିଃ ॥ 25 ॥

ତତ୍ରୈବଂ ଯୋଗିନଃ ସୂକ୍ଷ୍ମଂ ଦୃଷ୍ଟ୍ୱା ଦିବ୍ୟେନ ଚକ୍ଷୁଷା ।

ପୁରାଣଂ ଯୋଗତତ୍ତ୍ୱଜ୍ଞା ଗାୟନ୍ତି ତ୍ରିଗୁଣାନ୍ୱିତମ୍ ॥ 26 ॥

ରୁଦ୍ରଃ ସ୍ରଷ୍ଟା ହି ସର୍ୱେଷାଂ ଭୂତାନାଂ ତବ ଚ ପ୍ରଭୋ ।

ଅସ୍ମାଭିଶ୍ଚ ଭବାନ୍ସାର୍ଧଂ ଜଗତଃ ସମ୍ପ୍ରବର୍ତକଃ ॥ 27 ॥

ସ ଦେବସ୍ତୋଷିତଃ ସମ୍ୟକ୍ପରମୈଶ୍ୱର୍ୟଯୋଗଧୃକ୍ ।

ବ୍ରହ୍ମାଣମଗ୍ରଜଂ ପୁତ୍ରଂ ପ୍ରାଜାପତ୍ୟେଽଭ୍ୟଷେଚୟତ୍ ॥ 28 ॥

ଯଃ କୃତ୍ୱା ବହୁବିଧମାର୍ଗୟୋଗୟୁକ୍ତଂ ତତ୍ତ୍ୱାଖ୍ୟଂ

ଜଗଦିଦମାଦରାଦ୍ୟୁୟୋଜ ।

ଦେବାନାଂ ପରମମନନ୍ତୟୋଗୟୁକ୍ତଂ

ମାୟାଭିସ୍ତ୍ରିଭୁବନମନ୍ଧମପ୍ରସାଦମ୍ ॥ 29 ॥

ସର୍ୱେଷାଂ ମନସି ସଦାବତିଷ୍ଠମାନୋ ଜାନାନଃ ଶୁଭମଶୁଭଂ

ଚ ଭୂତନାଥଃ ।

ତଂ ଦେବଂ ପ୍ରମଥପତିଂ ପ୍ରଣମ୍ୟ ଭକ୍ତ୍ୟା ନିତ୍ୟଂ ବୈ

ଶରଣମୁପୈମି ସୂକ୍ଷ୍ମସୂକ୍ଷ୍ମମ୍ ॥ 30 ॥

 

ଇତି ସ୍କନ୍ଦପୁରାଣେ ତୃତୀୟୋଽଧ୍ୟାୟଃ ॥ 03 ॥

Click Link 👇Next ଅଧ୍ୟାୟ

https://skand-puran.blogspot.com/2024/11/SkandPuranA04.html

ସ୍କନ୍ଦପୁରାଣ Pdf 👇odia

https://archive.org/details/skanda-purana-utkala-khanda-/page/%E0%AD%A7%E0%AD%AC%E0%AD%A9/mode/1up

.