ସ୍କନ୍ଦପୁରାଣ ଅଧ୍ୟାୟ ୮

 ସ୍କନ୍ଦପୁରାଣ ଅଧ୍ୟାୟ ୮

ବାୟୁରୁବାଚ ।

ଏବମେଷା ଭଗବତୀ ବ୍ରହ୍ମଲୋକାନୁସାରିଣୀ ।

ଯୁଷ୍ମାକଂ ଧର୍ମସିଦ୍ଧ୍ୟର୍ଥଂ ବେଦୀମଧ୍ୟାଦ୍ୱ୍ୟବର୍ତତ ॥ 1 ॥

ସନତ୍କୁମାର ଉବାଚ ।

ଏବଂ ତେଷାଂ ସମାପ୍ତେଽଥ ସତ୍ତ୍ରେ ବର୍ଷସହସ୍ରିକେ ।

ପ୍ରବୃତ୍ତାୟାଂ ସରସ୍ୱତ୍ୟାମଗାତ୍ତତ୍ର ପିତାମହଃ ॥ 2 ॥

ବ୍ରହ୍ମୋବାଚ ।

ଭୂୟୋଽନ୍ୟେନ ହ ସତ୍ତ୍ରେଣ ଯଜଧ୍ୱଂ ଦେବମୀଶ୍ୱରମ୍ ।

ଯଦା ବୋ ଭବିତା ବିଘ୍ନଂ ତଦା ନିଷ୍କଲ୍ମଷଂ ତପଃ ॥ 3 ॥

ବିଘ୍ନଂ ତଚ୍ଚୈବ ସନ୍ତୀର୍ୟ ତପସ୍ତପ୍ତ୍ୱା ଚ ଭାସ୍ୱରମ୍ ।

ଯୋଗଂ ପ୍ରାପ୍ୟ ମହଦ୍ୟୁକ୍ତାସ୍ତତୋ ଦ୍ରକ୍ଷ୍ୟଥ ଶଙ୍କରମ୍ ॥ 4 ॥

ତଥେତ୍ୟୁକ୍ତ୍ୱା ଗତେ ତସ୍ମିନ୍ସତ୍ତ୍ରାଣ୍ୟାଜହ୍ରିରେ ତଦା ।

ବହୂନି ବିବିଧାକାରାଣ୍ୟଭିୟୁକ୍ତା ମହାବ୍ରତାଃ ॥ 5 ॥

ନିଃସୋମାଂ ପୃଥିବୀଂ କୃତ୍ୱା କୃତ୍ସ୍ନାମେତାଂ ତତୋ ଦ୍ୱିଜାଃ ।

ରାଜାନଂ ସୋମମାନାୟ୍ୟ ଅଭିଷେକ୍ତୁମିୟେଷିରେ ॥ 6 ॥

ଅଥ ସୋଽପି କୃତାତିଥ୍ୟଃ ଅଦୃଶ୍ୟେନ ଦୁରାତ୍ମନା ।

ସ୍ୱର୍ଭାନୁନା ହୃତଃ ସୋମସ୍ତତସ୍ତେ ଦୁଃଖିତାଭବନ୍ ॥ 7 ॥

ତେ ଗତ୍ୱା ମୁନୟଃ ସର୍ୱେ କଲାପଗ୍ରାମବାସିନଃ ।

ପୁରୂରବସମାନୀୟ ରାଜାନଂ ତେଽଭ୍ୟଷେଚୟନ୍ ॥ 8 ॥

ଊଚୁଶ୍ଚୈନଂ ମହାଭାଗା ହୃତଃ ସୋମୋ ହି ନଃ ପ୍ରଭୋ ।

କେନାପି ତଦ୍ଭବାନ୍କ୍ଷିପ୍ରମିହାନୟତୁ ମା ଚିରମ୍ ॥ 9 ॥

ସ ଏବମୁକ୍ତୋ ମୃଗୟନ୍ନ ତମାସାଦୟତ୍ପ୍ରଭୁଃ ।

ଉବାଚ ସ ତଦା ବିପ୍ରାନ୍ପ୍ରଣମ୍ୟ ଭୟପୀଡିତଃ ॥ 10 ॥

ପରମଂ ଯତ୍ନମାସ୍ଥାୟ ମୟା ସୋମୋଽଭିମାର୍ଗିତଃ ।

ନ ଚ ତଂ ବେଦ୍ମି କେନାସୌ କ୍ୱ ବା ନୀତ ଇତି ପ୍ରଭୁଃ ॥ 11 ॥

ତମେବଂବାଦିନଂ କ୍ରୁଦ୍ଧା ଋଷୟଃ ସଂଶିତବ୍ରତାଃ ।

ଊଚୁଃ ସର୍ୱେ ସୁସଂରବ୍ଧା ଇଲାପୁତ୍ରଂ ମହାମତିମ୍ ॥ 12 ॥

ଭବାନ୍ରାଜା କୁତସ୍ତ୍ରାତା କୃତୋଽସ୍ମାଭିର୍ଭୟାର୍ଦିତୈଃ ।

ନ ଚ ନସ୍ତଦ୍ଭୟଂ ଶକ୍ତୋ ବିନାଶୟିତୁମାଶ୍ୱପି ॥ 13 ॥

ବିଷୟେଷ୍ୱତିସକ୍ତାତ୍ମା ଯୋଗାତ୍ତଂ ନାନୁପଶ୍ୟସି ।

ତସ୍ମାଦ୍ୱିରୋଧମାସ୍ଥାୟ ଦ୍ୱିଜେଭ୍ୟୋ ବଧମାପ୍ସ୍ୟସି ॥ 14 ॥

ବୟମେବ ହି ରାଜାନମାନୟିଷ୍ୟାମ ଦୁର୍ୱିଦମ୍ ।

ତପସା ସ୍ୱେନ ରାଜେନ୍ଦ୍ର ପଶ୍ୟ ନୋ ବଲମୁତ୍ତମମ୍ ॥ 15 ॥

ତତସ୍ତେ ଋଷୟଃ ସର୍ୱେ ତପସା ଦଗ୍ଧକିଲ୍ବିଷାଃ ।

ଅସ୍ତୁବନ୍ୱାଗ୍ଭିରିଷ୍ଟାଭିର୍ଗାୟତ୍ରୀଂ ବେଦଭାବିନୀମ୍ ॥ 16 ॥

ସ୍ତୁବତାଂ ତୁ ତତସ୍ତେଷାଂ ଗାୟତ୍ରୀ ବେଦଭାବିନୀ ।

ରୂପିଣୀ ଦର୍ଶନଂ ପ୍ରାଦାଦୁବାଚେଦଂ ଚ ତାନ୍ଦ୍ୱିଜାନ୍ ॥ 17 ॥

ତୁଷ୍ଟାସ୍ମି ବତ୍ସାଃ କିଂ ବୋଽଦ୍ୟ କରୋମି ବରଦାସ୍ମି ବଃ ।

ବ୍ରୂତ ତତ୍କୃତମେବେହ ଭବିଷ୍ୟତି ନ ସଂଶୟଃ ॥ 18 ॥

ଋଷୟ ଊଚୁଃ ।

ସୋମୋ ନୋଽପହୃତୋ ଦେବି କେନାପି ସୁଦୁରାତ୍ମନା ।

ତମାନୟ ନମସ୍ତେଽସ୍ତୁ ଏଷ ନୋ ବର ଉତ୍ତମଃ ॥ 19 ॥

ସନତ୍କୁମାର ଉବାଚ ।

ସା ତଥୋକ୍ତା ବିନିଶ୍ଚିତ୍ୟ ଦୃଷ୍ଟ୍ୱା ଦିବ୍ୟେନ ଚକ୍ଷୁଷା ।

ଶ୍ୟେନୀଭୂତା ଜଗାମାଶୁ ସ୍ୱର୍ଭାନୁମସୁରଂ ପ୍ରତି ॥ 20 ॥

ବ୍ୟଗ୍ରାଣାମସୁରାଣାଂ ସା ଗୃହୀତ୍ୱା ସୋମମାଗତା ।

ଆଗମ୍ୟ ତାନୃଷୀନ୍ପ୍ରାହ ଅୟଂ ସୋମୋଽଭିଷୂୟତାମ୍ ॥ 21 ॥

ତେ ତମାସାଦ୍ୟ ଋଷୟଃ ପ୍ରାପ୍ୟ ଯଜ୍ଞଫଲଂ ମହତ୍ ।

ଅମନ୍ୟନ୍ତ ତପୋଽସ୍ମାକଂ ନିଷ୍କଲ୍ମଷମିତି ଦ୍ୱିଜାଃ ॥ 22 ॥

ତତସ୍ତତ୍ର ସ୍ୱୟଂ ବ୍ରହ୍ମା ସହ ଦେବୋରଗାଦିଭିଃ ।

ଆଗତ୍ୟ ତାନୃଷୀନ୍ପ୍ରାହ ତପଃ କୁରୁତ ମା ଚିରମ୍ ॥ 23 ॥

ତେ ସହ ବ୍ରହ୍ମଣା ଗତ୍ୱା ମୈନାକଂ ପର୍ୱତୋତ୍ତମମ୍ ।

ସର୍ୱୈର୍ଦେବଗଣୈଃ ସାର୍ଧଂ ତପଶ୍ଚେରୁଃ ସମାହିତାଃ ॥ 24 ॥

ତେଷାଂ କାଲେନ ମହତା ତପସା ଭାବିତାତ୍ମନାମ୍ ।

ଯୋଗପ୍ରବୃତ୍ତିରଭବତ୍ସୂକ୍ଷ୍ମୟୁକ୍ତାସ୍ତତସ୍ତୁ ତେ ॥ 25 ॥

ତେ ଯୁକ୍ତା ବ୍ରହ୍ମଣା ସାର୍ଧମୃଷୟଃ ସହ ଦେବତୈଃ ।

ମହେଶ୍ୱରେ ମନଃ ସ୍ଥାପ୍ୟ ନିଶ୍ଚଲୋପଲବତ୍ସ୍ଥିତାଃ ॥ 26 ॥

ଅଥ ତେଷାଂ ମହାଦେବଃ ପିନାକୀ ନୀଲଲୋହିତଃ ।

ଅଭ୍ୟଗଚ୍ଛତ ତଂ ଦେଶଂ ବିମାନେନାର୍କତେଜସା ॥ 27 ॥

ତଦ୍ଭାବଭାବିତାଞ୍ଜ୍ଞାତ୍ୱା ସଦ୍ଭାବେନ ପରେଣ ହ ।

ଉବାଚ ମେଘନିର୍ହ୍ରାଦଃ ଶତଦୁନ୍ଦୁଭିନିସ୍ୱନଃ ॥ 28 ॥

ଭୋ ଭୋ ସବ୍ରହ୍ମକା ଦେବାଃ ସବିଷ୍ଣୁଋଷିଚାରଣାଃ ।

ଦିବ୍ୟଂ ଚକ୍ଷୁଃ ପ୍ରୟଚ୍ଛାମି ପଶ୍ୟଧ୍ୱଂ ମାଂ ଯଥେପ୍ସିତମ୍ ॥ 29 ॥

ସନତ୍କୁମାର ଉବାଚ ।

ଅପଶ୍ୟନ୍ତ ତତଃ ସର୍ୱେ ସୂର୍ୟାୟୁତସମପ୍ରଭମ୍ ।

ବିମାନଂ ମେରୁସଙ୍କାଶଂ ନାନାରତ୍ନବିଭୂଷିତମ୍ ॥ 30 ॥

ତସ୍ୟ ମଧ୍ୟେଽଗ୍ନିକୂଟଂ ଚ ସୁମହଦ୍ଦୀପ୍ତିମାସ୍ଥିତମ୍ ।

ଜ୍ୱାଲାମାଲାପରିକ୍ଷିପ୍ତମର୍ଚିଭିରୁପଶୋଭିତମ୍ ॥ 31 ॥

ଦଂଷ୍ଟ୍ରାକରାଲବଦନଂ ପ୍ରଦୀପ୍ତାନଲଲୋଚନମ୍ ।

ତ୍ରେତାଗ୍ନିପିଶ୍ଣ୍ଗଲଜଟଂ ଭୁଜଗାବଦ୍ଧମେଖଲମ୍ ॥ 32 ॥

ମୃଷ୍ଟକୁଣ୍ଡଲିନଂ ଚୈବ ଶୂଲାସକ୍ତମହାକରମ୍ ।

ପିନାକିନଂ ଦଣ୍ଡହସ୍ତଂ ମୁଦ୍ଗରାଶନିପାଣିନମ୍ ॥ 33 ॥

ଅସିପଟ୍ଟିସହସ୍ତଂ ଚ ଚକ୍ରିଣଂ ଚୋର୍ଧ୍ୱମେହନମ୍ ।

ଅକ୍ଷସୂତ୍ରକରଂ ଚୈବ ଦୁଷ୍ପ୍ରେକ୍ଷ୍ୟମକୃତାତ୍ମଭିଃ ।

ଚନ୍ଦ୍ରାଦିତ୍ୟଗ୍ରହୈଶ୍ଚୈବ କୃତସ୍ରଗୁପଭୂଷଣମ୍ ॥ 34 ॥

ତମପଶ୍ୟନ୍ତ ତେ ସର୍ୱେ ଦେବା ଦିବ୍ୟେନ ଚକ୍ଷୁଷା ।

ଯଂ ଦୃଷ୍ଟ୍ୱା ନ ଭବେନ୍ମୃତ୍ୟୁର୍ମର୍ତ୍ୟସ୍ୟାପି କଦାଚନ ॥ 35 ॥

ତପସା ବିନିୟୋଗୟୋଗିନଃ ପ୍ରଣମନ୍ତୋ ଭବମିନ୍ଦୁନିର୍ମଲମ୍ ।

ବିୟତୀଶ୍ୱରଦତ୍ତଚକ୍ଷୁଷଃ ସହ ଦେବୈର୍ମୁନୟୋ ମୁଦାନ୍ୱିତାଃ ॥ 36 ॥

ପ୍ରସମୀକ୍ଷ୍ୟ ମହାସୁରେଶକାଲଂ ମନସା ଚାପି ବିଚାର୍ୟ ଦୁର୍ୱିସହ୍ୟମ୍ ।

ପ୍ରଣମନ୍ତି ଗତାତ୍ମଭାବଚିନ୍ତାଃ ସହ ଦେବୈର୍ଜଗଦୁଦ୍ଭବଂ ସ୍ତୁବନ୍ତଃ ॥ 37 ॥

ଇତି ସ୍କନ୍ଦପୁରାଣେ ଅଷ୍ଟମୋଽଧ୍ୟାୟଃ ॥ 08 ॥

Click Link 👇Next ଅଧ୍ୟାୟ

https://skand-puran.blogspot.com/2024/11/SkandPuranA09.html

ସ୍କନ୍ଦପୁରାଣ Pdf 👇odia

https://archive.org/details/skanda-purana-utkala-khanda-/page/%E0%AD%A7%E0%AD%AC%E0%AD%A9/mode/1up