ସ୍କନ୍ଦପୁରାଣ ଅଧ୍ୟାୟ ୯

 ସ୍କନ୍ଦପୁରାଣ ଅଧ୍ୟାୟ ୯

ସନତ୍କୁମାର ଉବାଚ ।

ତେ ଦୃଷ୍ଟ୍ୱା ଦେବଦେବେଶଂ ସର୍ୱେ ସବ୍ରହ୍ମକାଃ ସୁରାଃ ।

ଅସ୍ତୁବନ୍ୱାଗ୍ଭିରିଷ୍ଟାଭିଃ ପ୍ରଣମ୍ୟ ବୃଷବାହନମ୍ ॥ 1 ॥

ପିତାମହ ଉବାଚ ।

ନମଃ ଶିବାୟ ସୋମାୟ ଭକ୍ତାନାଂ ଭୟହାରିଣେ ।

ନମଃ ଶୂଲାଗ୍ରହସ୍ତାୟ କମଣ୍ଡଲୁଧରାୟ ଚ ॥ 2 ॥

ଦଣ୍ଡିନେ ନୀଲକଣ୍ଠାୟ କରାଲଦଶନାୟ ଚ ।

ତ୍ରେତାଗ୍ନିଦୀପ୍ତନେତ୍ରାୟ ତ୍ରିନେତ୍ରାୟ ହରାୟ ଚ ॥ 3 ॥

ନମଃ ପିନାକିନେ ଚୈବ ନମୋଽସ୍ତ୍ୱଶନିଧାରିଣେ ।

ବ୍ୟାଲୟଜ୍ଞୋପବୀତାୟ କୁଣ୍ଡଲାଭରଣାୟ ଚ ॥ 4 ॥

ନମଶ୍ଚକ୍ରଧରାୟୈବ ବ୍ୟାଘ୍ରଚର୍ମଧରାୟ ଚ ।

କୃଷ୍ଣାଜିନୋତ୍ତରୀୟାୟ ସର୍ପମେଖଲିନେ ତଥା ॥ 5 ॥

ବରଦାତ୍ରେ ଚ ରୁଦ୍ରାୟ ସରସ୍ୱତୀସୃଜେ ତଥା ।

ସୋମସୂର୍ୟର୍କ୍ଷମାଲାୟ ଅକ୍ଷସୂତ୍ରକରାୟ ଚ ॥ 6 ॥

ଜ୍ୱାଲାମାଲାସହସ୍ରାୟ ଊର୍ଧ୍ୱଲିଶ୍ଣ୍ଗାୟ ବୈ ନମଃ ।

ନମଃ ପର୍ୱତବାସାୟ ଶିରୋହର୍ତ୍ରେ ଚ ମେ ପୁରା ॥ 7 ॥

ହାଲାହଲବିନାଶାୟ କପାଲବରଧାରିଣେ ।

ବିମାନବରବାହାୟ ଜନକାୟ ମମୈବ ଚ ।

ବରଦାୟ ବରିଷ୍ଠାୟ ଶ୍ମଶାନରତୟେ ନମଃ ॥ 8 ॥

ନମୋ ନରସ୍ୟ କର୍ତ୍ରେ ଚ ସ୍ଥିତିକର୍ତ୍ରେ ନମଃ ସଦା ।

ଉତ୍ପତ୍ତିପ୍ରଲୟାନାଂ ଚ କର୍ତ୍ରେ ସର୍ୱସହାୟ ଚ ॥ 9 ॥

ଋଷିଦୈବତନାଥାୟ ସର୍ୱଭୂତାଧିପାୟ ଚ ।

ଶିବଃ ସୌମ୍ୟଶ୍ଚ ଦେବେଶ ଭବ ନୋ ଭକ୍ତବତ୍ସଲ ॥ 10 ॥

ସନତ୍କୁମାର ଉବାଚ ।

ବ୍ରହ୍ମଣ୍ୟଥୈବଂ ସ୍ତୁବତି ଦେବଦେବଃ ସ ଲୋକପଃ ।

ଉବାଚ ତୁଷ୍ଟସ୍ତାନ୍ଦେବାନୃଷୀଂଶ୍ଚ ତପସୈଧିତାନ୍ ॥ 11 ॥

ତୁଷ୍ଟୋଽସ୍ମ୍ୟନେନ ବଃ ସମ୍ୟକ୍ତପସା ଋଷିଦେବତାଃ ।

ବରଂ ବ୍ରୂତ ପ୍ରଦାସ୍ୟାମି ସୁନିଶ୍ଚିନ୍ତ୍ୟ ସ ଉଚ୍ୟତାମ୍ ॥ 12 ॥

ସନତ୍କୁମାର ଉବାଚ ।

ଅଥ ସର୍ୱାନଭିପ୍ରେକ୍ଷ୍ୟ ସନ୍ତୁଷ୍ଟାଂସ୍ତପସୈଧିତାନ୍ ।

ଦର୍ଶନେନୈବ ବିପ୍ରେନ୍ଦ୍ର ବ୍ରହ୍ମା ବଚନମବ୍ରବୀତ୍ ॥ 13 ॥

ବ୍ରହ୍ମୋବାଚ ।

ଯଦି ତୁଷ୍ଟୋଽସି ଦେବେଶ ଯଦି ଦେୟୋ ବରଶ୍ଚ ନଃ ।

ତସ୍ମାଚ୍ଛିବଶ୍ଚ ସୌମ୍ୟଶ୍ଚ ଦୃଶ୍ୟଶ୍ଚୈବ ଭବସ୍ୱ ନଃ ॥ 14 ॥

ସୁଖସଂବ୍ୟବହାର୍ୟଶ୍ଚ ନିତ୍ୟଂ ତୁଷ୍ଟମନାସ୍ତଥା ।

ସର୍ୱକାର୍ୟେଷୁ ଚ ସଦା ହିତଃ ପଥ୍ୟଶ୍ଚ ଶଙ୍କରଃ ॥ 15 ॥

ସହ ଦେବ୍ୟା ସସୂନୁଶ୍ଚ ସହ ଦେବଗଣୈରପି ।

ଏଷ ନୋ ଦୀୟତାଂ ଦେବ ବରୋ ବରସହସ୍ରଦ ॥ 16 ॥

ସନତ୍କୁମାର ଉବାଚ ।

ଏବମୁକ୍ତଃ ସ ଭଗବାନ୍ବ୍ରହ୍ମଣା ଦେବସତ୍ତମଃ ।

ସ୍ୱକଂ ତେଜୋ ମହଦ୍ଦିବ୍ୟଂ ବ୍ୟସୃଜତ୍ସର୍ୱୟୋଗବିତ୍ ॥ 17 ॥

ଅର୍ଧେନ ତେଜସଃ ସ୍ୱସ୍ୟ ମୁଖାଦୁଲ୍କାଂ ସସର୍ଜ ହ ।

ତାମାହ ଭବ ନାରୀତି ଭଗବାନ୍ୱିଶ୍ୱରୂପଧୃକ୍ ॥ 18 ॥

ସାକାଶଂ ଦ୍ୟାଂ ଚ ଭୂମିଂ ଚ ମହିମ୍ନା ବ୍ୟାପ୍ୟ ବିଷ୍ଠିତା ।

ଉପତସ୍ଥେ ଚ ଦେବେଶଂ ଦୀପ୍ୟମାନା ଯଥା ତଡିତ୍ ॥ 19 ॥

ତାମାହ ପ୍ରହସନ୍ଦେବୋ ଦେବୀଂ କମଲଲୋଚନାମ୍ ।

ବ୍ରହ୍ମାଣଂ ଦେବି ବରଦମାରାଧୟ ଶୁଚିସ୍ମିତେ ॥ 20 ॥

ସା ତଥେତି ପ୍ରତିଜ୍ଞାୟ ତପସ୍ତପ୍ତୁଂ ପ୍ରଚକ୍ରମେ ।

ରୁଦ୍ରଶ୍ଚ ତାନୃଷୀନାହ ଶୃଣୁଧ୍ୱଂ ମମ ତୋଷଣେ ।

ଫଲଂ ଫଲବତାଂ ଶ୍ରେଷ୍ଠା ଯଦ୍ବ୍ରବୀମି ତପୋଧନାଃ ॥ 21 ॥

ଅମରା ଜରୟା ତ୍ୟକ୍ତା ଅରୋଗା ଜନ୍ମବର୍ଜିତାଃ ।

ମଦ୍ଭକ୍ତାସ୍ତପସା ଯୁକ୍ତା ଇହୈବ ଚ ନିବତ୍ସ୍ୟଥ ॥ 22 ॥

ଅୟଂ ଚୈବାଶ୍ରମଃ ଶ୍ରେଷ୍ଠଃ ସ୍ୱର୍ଣଶୃଶ୍ଣ୍ଗୋଽଚଲୋତ୍ତମଃ ।

ପୁଣ୍ୟଂ ପବିତ୍ରଂ ସ୍ଥାନଂ ବୈ ଭବିଷ୍ୟତି ନ ସଂଶୟଃ ॥ 23 ॥

ମୈନାକେ ପର୍ୱତେ ଶ୍ରେଷ୍ଠେ ସ୍ୱର୍ଣୋଽହମଭବଂ ଯତଃ ।

ସ୍ୱର୍ଣାକ୍ଷୀଂ ଚାସୃଜଂ ଦେବୀଂ ସ୍ୱର୍ଣାକ୍ଷଂ ତେନ ତତ୍ସ୍ମୃତମ୍ ॥ 24 ॥

ସ୍ୱର୍ଣାକ୍ଷେ ଋଷୟୋ ଯୂୟଂ ଷଟ୍କୁଲୀୟାସ୍ତପୋଧନାଃ ।

ନିବତ୍ସ୍ୟଥ ମୟାଜ୍ଞପ୍ତାଃ ସ୍ୱର୍ଣାକ୍ଷଂ ବୈ ତତଶ୍ଚ ହ ।

ସମନ୍ତାଦ୍ୟୋଜନଂ କ୍ଷେତ୍ରଂ ପବିତ୍ରଂ ତନ୍ନ ସଂଶୟଃ ॥ 25 ॥

ଦେବଗନ୍ଧର୍ୱଚରିତମପ୍ସରୋଗଣସେବିତମ୍ ।

ସିଂହେଭଶରଭାକୀର୍ଣଂ ଶାର୍ଦୂଲର୍କ୍ଷମୃଗାକୁଲମ୍ ।

ଅନେକବିହଗାକୀର୍ଣଂ ଲତାବୃକ୍ଷକ୍ଷୁପାକୁଲମ୍ ॥ 26 ॥

ବ୍ରହ୍ମଚାରୀ ନିୟମବାଞ୍ଜିତକ୍ରୋଧୋ ଜିତେନ୍ଦ୍ରିୟଃ ।

ଉପୋଷ୍ୟ ତ୍ରିଗୁଣାଂ ରାତ୍ରିଂ ଚରୁଂ କୃତ୍ୱା ନିବେଦ୍ୟ ଚ ।

ଯତ୍ର ତତ୍ର ମୃତଃ ସୋଽପି ବ୍ରହ୍ମଲୋକେ ନିବତ୍ସ୍ୟତି ॥ 27 ॥

ଯୋଽପ୍ୟେବମେବ କାମାତ୍ମା ପଶ୍ୟେତ୍ତତ୍ର ବୃଷଧ୍ୱଜମ୍ ।

ଗୋସହସ୍ରଫଲଂ ସୋଽପି ମତ୍ପ୍ରସାଦାଦବାପ୍ସ୍ୟତି ।

ନିୟମେନ ମୃତଶ୍ଚାତ୍ର ମୟା ସହ ଚରିଷ୍ୟତି ॥ 28 ॥

ଯାବତ୍ସ୍ଥାସ୍ୟନ୍ତି ଲୋକାଶ୍ଚ ମୈନାକଶ୍ଚାପ୍ୟଯଂ ଗିରିଃ ।

ତାବତ୍ସହ ମୟା ଦେବା ମତ୍ପ୍ରସାଦାଚ୍ଚରିଷ୍ୟଥ ॥ 29 ॥

ଏବଂ ସ ତାନୃଷୀନୁକ୍ତ୍ୱା ଦୃଷ୍ଟ୍ୱା ସୌମ୍ୟେନ ଚକ୍ଷୁଷା ।

ପଶ୍ୟତାମେବ ସର୍ୱେଷାଂ ତତ୍ରୈବାନ୍ତରଧୀୟତ ॥ 30 ॥

ସନତ୍କୁମାର ଉବାଚ ।

ଯ ଇମଂ ଶୃଣୁୟାନ୍ମର୍ତ୍ୟୋ ଦ୍ୱିଜାତୀଞ୍ଛ୍ରାବୟେତ ବା ।

ସୋଽପି ତତ୍ଫଲମାସାଦ୍ୟ ଚରେନ୍ମୃତ୍ୟୁବିବର୍ଜିତଃ ॥ 31 ॥

ଜୟତି ଜଲଦବାହଃ ସର୍ୱଭୂତାନ୍ତକାଲଃ ଶମଦମନିୟତାନାଂ

କ୍ଲେଶହର୍ତା ଯତୀନାମ୍ ।

ଜନନମରଣହର୍ତା ଚେଷ୍ଟତାଂ ଧାର୍ମିକାଣାଂ ବିବିଧକରଣୟୁକ୍ତଃ

ଖେଚରଃ ପାଦଚାରୀ ॥ 32 ॥

ମଦନପୁରବିଦାରୀ ନେତ୍ରଦନ୍ତାବପାତୀ ବିଗତଭୟବିଷାଦଃ

ସର୍ୱଭୂତପ୍ରଚେତାଃ ।

ସତତମଭିଦଧାନଶ୍ଚେକିତାନାତ୍ମଚିତ୍ତଃ କରଚରଣଲଲାମଃ

ସର୍ୱଦୃଗ୍ଦେବଦେବଃ ॥ 33 ॥

ଇତି ସ୍କନ୍ଦପୁରାଣେ ନବମୋଽଧ୍ୟାୟଃ ॥ 09 ॥

Click Link 👇Next ଅଧ୍ୟାୟ

https://skand-puran.blogspot.com/2024/11/SkandPuranA010.html

ସ୍କନ୍ଦପୁରାଣ Pdf 👇 odia

https://archive.org/details/skanda-purana-utkala-khanda-/page/%E0%AD%A7%E0%AD%AC%E0%AD%A9/mode/1up

Brass Jagannath

https://amzn.to/45dBJyl