ସ୍କନ୍ଦପୁରାଣ ଅଧ୍ୟାୟ ୧୮
ସ୍କନ୍ଦପୁରାଣ ଅଧ୍ୟାୟ ୧୮
ସନତ୍କୁମାର ଉବାଚ ।ତତଃ ସ ରାଜା ସ୍ୱଂ ରାଜ୍ୟମୁତ୍ସୃଜ୍ୟ ସହ ଭାର୍ୟଯା ।ବନଂ ବିବେଶ ତତ୍ରାଭୂତ୍ପୁରୁଷାଦୋ ମହାବଲଃ ॥ସୋଽଭକ୍ଷୟତ ତତ୍ରାଗ୍ରେ ଶକ୍ତିମେବ ମହାମୁନିମ୍ ।ତତୋ ଭ୍ରାତୃଶତଂ ତସ୍ୟ ବସିଷ୍ଠସ୍ୟୈବ ପଶ୍ୟତଃ ॥ତତଃ ପୁତ୍ରବଧଂ ଘୋରଂ ଦୃଷ୍ଟ୍ୱା ବ୍ରହ୍ମସୁତଃ ପ୍ରଭୁଃ ।ନୋତ୍ସସର୍ଜ ତଦା କ୍ରୋଧଂ ବସିଷ୍ଠଃ କୌଶିକଂ ପ୍ରତି ।ପୁତ୍ରଶୋକେନ ମହତା ଭୃଶମେବାନ୍ୱକୀର୍ୟତ ॥ସ ବଦ୍ଧ୍ୱା ମହତୀଂ କଣ୍ଠେ ଶିଲାଂ ବ୍ରହ୍ମସୁତଃ ପ୍ରଭୁଃ ।ନଦ୍ୟାମାତ୍ମାନମୁତ୍ସୃଜ୍ୟ ଶତଧା ସାଦ୍ରବଦ୍ଭୟାତ୍ ।ଶତଦ୍ରୂରିତି ତାଂ ପ୍ରାହୁର୍ମୁନୟଃ ସଂଶିତବ୍ରତାଃ ॥ପୁନଃ ପାଶୈର୍ଦୃଢୈର୍ବଦ୍ଧ୍ୱା ଅନ୍ୟସ୍ୟାମସୃଜଦ୍ୱଶୀ ।ତସ୍ୟାଂ ବିପାଶଃ ସଂବୃତ୍ତୋ ବିପାଶା ସାଭବତ୍ତତଃ ॥ତତୋଽଟବୀଂ ସମାସାଦ୍ୟ ନିରାହାରୋ ଜିତେନ୍ଦ୍ରିୟଃ ।ବାୟୁଭକ୍ଷସ୍ତଦା ତସ୍ଥୌ ସ୍ୱଂ ଦେହଂ ପରିତାପୟନ୍ ॥ଅଥ ଶୁଶ୍ରାବ ବେଦାନାଂ ଧ୍ୱନିମେକସ୍ୟ ସୁସ୍ୱରମ୍ ।ଅଧୀୟାନସ୍ୟ ତତ୍ରାଶୁ ଧ୍ୟାନମେବାନ୍ୱପଦ୍ୟତ ॥ଅଥୈନଂ ଚାରୁସର୍ୱାଶ୍ଣ୍ଗୀ ପୀନୋନ୍ନତପୟୋଧରା ।ଉପତସ୍ଥେଽଗ୍ରତଃ ପତ୍ନୀ ଶକ୍ତେର୍ଦୀନାନନେକ୍ଷଣା ॥ତାମୁବାଚ କୁତସ୍ତ୍ୱଂ ବୈ କସ୍ୟୈଷ ଶ୍ରୂୟତେ ଧ୍ୱନିଃ ।ସୋବାଚ ଦୀନୟା ବାଚା ରୁଦତୀ ଶ୍ୱଶୁରଂ ତଦା ॥ଅଦୃଶ୍ୟନ୍ତ୍ୟୁବାଚ ।ଯଦୈବ ସୁତଦୁଃଖେନ ନିର୍ଗତୋଽସ୍ୟାଶ୍ରମାଦ୍ଗୁରୋ ।ତଦାପ୍ରଭୃତ୍ୟେବାଦୃଶ୍ୟା ଭଗବନ୍ତମନୁବ୍ରତା ॥ଅଧୀୟାନସ୍ୟ ଚୈବାୟଂ ଧ୍ୱନିଃ ପୁତ୍ରସ୍ୟ ତେ ବିଭୋ ।ଉଦରସ୍ଥସ୍ୟ ତେ ସୂନୋର୍ମା ଦୁଃଖେ ତ୍ୱଂ ମନଃ କୃଥାଃ ॥ସନତ୍କୁମାର ଉବାଚ ।ଇଦାନୀମସ୍ତି ମେ ବତ୍ସେ ଜୀବିତାଶେତି ସୋଽବ୍ରବୀତ୍ ।କ୍ଷାନ୍ତିଂ ଧୃତିଂ ଚ ସଂସ୍ଥିତ୍ୟ ପ୍ରୟଯାବାଶ୍ରମଂ ମୁନିଃ ॥ତଦାଶ୍ରମପଦଂ ଗଚ୍ଛନ୍ପଥି ରାଜାନମୈକ୍ଷତ ।ବସାରୁଧିରଦିଗ୍ଧାଶ୍ଣ୍ଗଂ ସୌଦାସଂ ରକ୍ତଲୋଚନମ୍ ॥ଅଭିଦ୍ରବନ୍ତଂ ବେଗେନ ମନ୍ତ୍ରୈରସ୍ତମ୍ଭୟନ୍ମୁନିଃ ।ତତୋଽସ୍ୟ ନିର୍ଗତଃ କାୟାଦ୍ରକ୍ଷଃ ପରମଦାରୁଣଃ ॥ଉବାଚ ଚୈନଂ ଦୁଷ୍ଟାତ୍ମନ୍ଦହେୟଂ ତ୍ୱାଂ ସବାନ୍ଧବମ୍ ।ଦଗ୍ଧେନ ଚ ତ୍ୱୟା କିଂ ମେ ଗଚ୍ଛ ମୁକ୍ତୋଽସି ଦୁର୍ମତେ ॥ତତଃ ସ ମୁକ୍ତୋ ଦୀନାତ୍ମା ରାକ୍ଷସଃ କ୍ରୂରକର୍ମକୃତ୍ ।ପ୍ରଣମ୍ୟ ଶିରସା ଭୀତୋ ଜଗାମ କୁଶିକାନ୍ତିକମ୍ ॥ଗତେ ନିଶାଚରେ ରାଜା ପ୍ରଣମ୍ୟ ଶିରସା ମୁନିମ୍ ।ପ୍ରସାଦୟାମାସ ତଦା ସ ଚୋବାଚେଦମର୍ଥବତ୍ ॥ନ ଦୋଷସ୍ତବ ରାଜେନ୍ଦ୍ର ରକ୍ଷସାଧିଷ୍ଠିତସ୍ୟ ବୈ ।କୃତାନ୍ତେନ ହତାଃ ପୁତ୍ରା ନିମିତ୍ତଂ ତତ୍ର ରାକ୍ଷସଃ ॥ପ୍ରଶାଧି ରାଜ୍ୟଂ ରାଜେନ୍ଦ୍ର ପିତୃପୈତାମହଂ ବିଭୋ ।ବ୍ରୂହି କିଂ ବା ପ୍ରିୟଂ ତେଽଦ୍ୟ କରୋମି ନରପୁଙ୍ଗବ ॥ରାଜୋବାଚ ।ଇଚ୍ଛାମି ଭଗବନ୍ପୁତ୍ରଂ ତ୍ୱୟୋତ୍ପାଦିତମଚ୍ୟୁତ ।ଦେବ୍ୟାମସ୍ୟାଂ ମହାସତ୍ତ୍ୱଂ ତତ୍କୁରୁଷ୍ୱ ମମ ପ୍ରିୟମ୍ ॥ସନତ୍କୁମାର ଉବାଚ ।ଏବମସ୍ତ୍ୱିତ୍ୟଥୋକ୍ତ୍ୱାସୌ ତସ୍ୟାଂ ପତ୍ନ୍ୟାଂ ମହାବ୍ରତଃ ।ପୁତ୍ରଂ ଚ ଶୋଣକଂ ନାମ ଜନୟାମାସ ନିର୍ୱୃତଃ ॥ତଂ ଶୋଣକଂ ତତୋ ରାଜ୍ୟେ ସ୍ୱଂ ପୁତ୍ରମଭିଷିଚ୍ୟ ସଃ ।ଜଗାମ ବନମେବାଶୁ ସଭାର୍ୟସ୍ତପସି ସ୍ଥିତଃ ॥ବସିଷ୍ଠସ୍ୟାପି କାଲେନ ଶକ୍ତେଃ ପୁତ୍ରଃ ପ୍ରତାପବାନ୍ ।ଅଦୃଶ୍ୟନ୍ତ୍ୟାଂ ସମଭବତ୍ପୁତ୍ରୋ ନାମ୍ନା ପରାଶରଃ ॥ବସିଷ୍ଠଂ ତୁ ତଦା ଧୀମାଂସ୍ତାତମେବାଭ୍ୟମନ୍ୟତ ।ତାତ ତାତେତି ଚ ମୁହୁର୍ୱ୍ୟାଜହାର ପିତୁର୍ଗୁରୁମ୍ ॥ତତଃ କଦାଚିଦ୍ୱିଜ୍ଞାୟ ଭକ୍ଷିତଂ ରକ୍ଷସା ଶୁଚିମ୍ ।ପିତରଂ ତପସା ମନ୍ତ୍ରୈରୀଜେ ରକ୍ଷଃକ୍ରତୌ ତଦା ॥ତତ୍ର କୋଟୀଃ ସ ପଞ୍ଚାଶଦ୍ରକ୍ଷସାଂ କ୍ରୂରକର୍ମଣାମ୍ ।ଜୁହାବାଗ୍ନୌ ମହାତେଜାସ୍ତତୋ ବ୍ରହ୍ମାଭ୍ୟଗାଦ୍ଦ୍ରୁତମ୍ ॥ସୁତମଭ୍ୟେତ୍ୟ ସମ୍ପୂଜ୍ୟ ବସିଷ୍ଠସହିତଃ ପ୍ରଭୁଃ ।ଋଷିଭିର୍ଦୈବତୈଶ୍ଚୈବ ଇଦମାହ ପରାଶରମ୍ ॥ବ୍ରହ୍ମୋବାଚ ।ଦେବତାସ୍ତେ ପତନ୍ତି ସ୍ମ ଯଜ୍ଞୈର୍ମନ୍ତ୍ରପୁରସ୍କୃତୈଃ ।ଅଷ୍ଟମଂ ସ୍ଥାନମେତଦ୍ଧି ଦେବାନାମାଦ୍ୟମୀଦୃଶମ୍ ॥ପରାଶର ଉବାଚ ।ସହ ଦେବୈରହଂ ସର୍ୱା/ଲ୍ଲୋକାନ୍ଧକ୍ଷ୍ୟାମି ପାବକୈଃ ।ଦଗ୍ଧ୍ୱାନ୍ୟାନ୍ପ୍ରଥୟିଷ୍ୟାମି ତତ୍ର ଲୋକାନ୍ନ ସଂଶୟଃ ॥ସନତ୍କୁମାର ଉବାଚ ।ତସ୍ୟୈବଂ ଗର୍ୱିତଂ ବାକ୍ୟଂ ଶ୍ରୁତ୍ୱା ଦେବଃ ପିତାମହଃ ।ଉବାଚ ଶ୍ଲକ୍ଷ୍ଣୟା ବାଚା ସାନ୍ତ୍ୱୟଂସ୍ତମିଦଂ ବଚଃ ॥ପିତାମହ ଉବାଚ ।କୃତମେତନ୍ନ ସନ୍ଦେହୋ ଯଥା ବ୍ରୂଷେ ମହାମତେ ।କ୍ଷନ୍ତବ୍ୟଂ ସର୍ୱମେତତ୍ତୁ ଅସ୍ମତ୍ପ୍ରିୟଚିକୀର୍ଷୟା ॥ଯୈସ୍ତେ ପିତା ମହାଭାଗ ଭକ୍ଷିତଃ ସହ ସୋଦରୈଃ ।ତ ଏବାଗ୍ନୌ ଚ ହୋତବ୍ୟା ବିଶ୍ୱାମିତ୍ରସ୍ୟ ପଶ୍ୟତଃ ।ଅନ୍ୟେଷାଂ ସ୍ୱସ୍ତି ସର୍ୱତ୍ର ଦେବାନାଂ ସହ ରାକ୍ଷସୈଃ ॥ତସ୍ୟ ସଙ୍କଲ୍ପସନ୍ତପ୍ତୋ ମନ୍ୟୁମୂଲମୁଦାହରତ୍ ।ବସିଷ୍ଠସ୍ୟ ମହାଭାଗ ତ୍ୱଂ ନିବାରୟ ପୁତ୍ରକ ॥ଦେବାଃ ପ୍ରାଞ୍ଜଲୟଃ ସର୍ୱେ ପ୍ରଣେମୁସ୍ତେ ମହାମୁନିମ୍ ।ଋଷୟଶ୍ଚୈବ ତେ ସର୍ୱେ ବାଗ୍ଭିସ୍ତୁଷ୍ଟୁବିରେ ତଦା ॥ତତସ୍ତେଷାଂ ମହାତେଜା ବଚାଂସି ପ୍ରତ୍ୟପୂଜୟତ୍ ।ବିଶ୍ୱାମିତ୍ରସ୍ୟ ମିଷତ ଇଦଂ ପ୍ରୋବାଚ ସୁସ୍ୱରମ୍ ॥ଯ ଏଷାଂ ବ୍ରାହ୍ମଣୋ ବାପି କ୍ଷତ୍ରିୟୋ ବା ଦୁରାତ୍ମବାନ୍ ।ରକ୍ଷସାଂ ପକ୍ଷମାସ୍ଥାୟ ପ୍ରତୀକାରଂ କରିଷ୍ୟତି ॥ତମପ୍ୟତ୍ରାପି ସଙ୍କ୍ରୁଦ୍ଧସ୍ତପୋୟୋଗବଲାନ୍ୱିତଃ ।ବିହତ୍ୟ ତପସୋ ଯୋଗାଦ୍ଧୋଷ୍ୟେ ଦୀପ୍ତେ ବିଭାବସୌ ॥ସନତ୍କୁମାର ଉବାଚ ।ତତୋ ଦେବାଃ ସଗନ୍ଧର୍ୱାଃ ପିତାମହପୁରଃସରାଃ ।ପ୍ରଭାବଂ ତସ୍ୟ ତଂ ଜ୍ଞାତ୍ୱା ପରାଶରମପୂଜୟନ୍ ॥ହୁତେଷୁ ଚ ତତସ୍ତେଷୁ ରାକ୍ଷସେଷୁ ଦୁରାତ୍ମସୁ ।ସଞ୍ଜହାର ତତଃ ସତ୍ତ୍ରଂ ବ୍ରହ୍ମଣୋଽନୁମତେ ତଦା ॥ସନତ୍କୁମାର ଉବାଚ ।ଯ ଇମଂ ଶ୍ରାଦ୍ଧକାଲେ ବା ଦୈବେ କର୍ମଣି ବା ଦ୍ୱିଜାନ୍ ।ଶ୍ରାବୟୀତ ଶୁଚିର୍ଭୂତ୍ୱା ନ ତଂ ହିଂସନ୍ତି ରାକ୍ଷସାଃ ॥ପରାଶରସ୍ୟେଦମଦୀନସମ୍ଭବଂ ବିଶୁଦ୍ଧବାକ୍କର୍ମବିଧାନସମ୍ଭବମ୍ ।ନିଶାମ୍ୟ ବିପ୍ରଃ କୁଲସିଦ୍ଧିସମ୍ଭବଂ ନ ରାକ୍ଷସଂ ଗଚ୍ଛତିଯୋନିସମ୍ଭବମ୍ ॥ଇତି ସ୍କନ୍ଦପୁରାଣେଽଷ୍ଟାଦଶମୋଽଧ୍ୟାୟଃ ॥ 18 ॥
Click Link 👇Next ଅଧ୍ୟାୟ
Comments
Post a Comment