ସ୍କନ୍ଦପୁରାଣ ଅଧ୍ୟାୟ ୧୯
ସ୍କନ୍ଦପୁରାଣ ଅଧ୍ୟାୟ ୧୯
ସନତ୍କୁମାର ଉବାଚ ।ଏବଂ ତବ ପିତା ବ୍ୟାସ ରକ୍ଷଃସତ୍ତ୍ରଂ ସମାହରତ୍ ।ସମାପୟିତ୍ୱା ଚ ପୁନସ୍ତପସ୍ତେପେ ଚ ଭାସ୍ୱରମ୍ ॥ତମାଗତ୍ୟ ବସିଷ୍ଠସ୍ତୁ ତପସା ଭାସ୍କରଦ୍ୟୁତିମ୍ ।ଉବାଚ ପ୍ରୀତିସମ୍ପନ୍ନମିଦମର୍ଥବଦବ୍ୟଯଃ ॥ବସିଷ୍ଠ ଉବାଚ ।ପିତରଃ ପୁତ୍ରକାମା ବୈ ତପଃ କୃତ୍ୱାତିଦୁଶ୍ଚରମ୍ ।ପୁତ୍ରମୁତ୍ପାଦୟନ୍ତି ସ୍ମ ତପୋଜ୍ଞାନସମନ୍ୱିତମ୍ ॥ଅୟଂ ନଃ ସନ୍ତତିଂ ଚୈବ ଜ୍ଞାନବାଂସ୍ତପସାନ୍ୱିତଃ ।କରିଷ୍ୟତି ଗତିଂ ଚୈବ ଇତି ବେଦବିଦୋ ବିଦୁଃ ॥ସ ତ୍ୱଂ ତପୋନ୍ୱିତଶ୍ଚୈବ ଜ୍ଞାନବାନ୍ୟଶସାନ୍ୱିତଃ ।ପୁତ୍ରଃ ପୁତ୍ରବତାଂ ଶ୍ରେଷ୍ଠୋ ବିହୀନଃ ପ୍ରଜୟା ବିଭୋ ॥ତସ୍ମାତ୍ପିତ୍।ର଼୍ଣାମାନୃଣ୍ୟଂ ଗଚ୍ଛ ବ୍ରତବତାଂ ବର ।ସୁତମୁତ୍ପାଦୟ କ୍ଷିପ୍ରମଧିକଂ ସମମେବ ବା ॥ସନତ୍କୁମାର ଉବାଚ ।ସ ଏବମୁକ୍ତସ୍ତେଜସ୍ୱୀ ବସିଷ୍ଠେନାମିତାତ୍ମନା ।ମୈନାକଂ ପର୍ୱତଂ ପ୍ରାପ୍ୟ ତପସ୍ତେପେ ସୁଦୁଶ୍ଚରମ୍ ॥ତସ୍ୟ କାଲେନ ମହତା ତପସା ଭାବିତସ୍ୟ ତୁ ।ଉମାପତିର୍ୱରଂ ପ୍ରାଦାତ୍ସ ଚ ବବ୍ରେ ସୁତଂ ଶୁଭମ୍ ॥ସ ଲବ୍ଧବର ଆଗମ୍ୟ ଯୟାଚେ ପୁତ୍ରକାରଣାତ୍ ।କ୍ଷେତ୍ରଂ ସୁପରିଶୁଦ୍ଧଂ ଚ ସ୍ୱପୁତ୍ରୋ ଯତ୍ର ସମ୍ଭବେତ୍ ॥ସମ୍ଭ୍ରମନ୍ଦାଶରାଜସ୍ୟ ଦୁହିତୃତ୍ୱମୁପାଗତାମ୍ ।ପିତୃକନ୍ୟାଂ ତତଃ କାଲୀମପଶ୍ୟଦ୍ଦିବ୍ୟରୂପିଣୀମ୍ ॥ମତ୍ସୀଗର୍ଭସମୁତ୍ପନ୍ନାଂ ବସୋର୍ବୀଜାଶନାତ୍ପୁରା ।ଅଦ୍ରିକାମପ୍ସରଃଶ୍ରେଷ୍ଠାଂ ବ୍ରହ୍ମତେଜୋମୟୀଂ ଶୁଭାମ୍ ॥ତସ୍ୟାଂ ସ ଜନୟାମାସ ବରଂ ଦତ୍ତ୍ୱା ମହାତପାଃ ।ଭବନ୍ତଂ ତପସାଂ ଯୋନିଂ ଶ୍ରୌତସ୍ମାର୍ତପ୍ରବର୍ତକମ୍ ॥ତବ ପୁତ୍ରୋଽଭବଚ୍ଚାପି ଶୁକୋ ଯୋଗବିଦାଂ ବରଃ ।ତସ୍ୟ ପୁତ୍ରାଶ୍ଚ ଚତ୍ୱାରଃ କନ୍ୟା ଚୈକା ସୁମଧ୍ୟମା ॥ବ୍ୟାସ ଉବାଚ ।କଥଂ ବୈରଂ ସମଭବଦ୍ୱିଶ୍ୱାମିତ୍ରବସିଷ୍ଠୟୋଃ ।କଥଂ ଚାପଗତଂ ଭୂୟ ଏତଦିଚ୍ଛାମି ବେଦିତୁମ୍ ॥ସନତ୍କୁମାର ଉବାଚ ।ପରାଶରେ ତୁ ଗର୍ଭସ୍ଥେ ବିପ୍ରତ୍ୱଂ ଗାଧିଜେ ଗତେ ।ସରସ୍ୱତ୍ୟାଂ କୁରୁକ୍ଷେତ୍ରେ ଦ୍ୱୟୋରପ୍ୟାଶ୍ରମୌ ତୟୋଃ ॥ତତ୍ର ବୈରମନୁସ୍ମୃତ୍ୟ ବିଶ୍ୱାମିତ୍ରେଣ ଧୀମତା ।ମିଷତସ୍ତୁ ବସିଷ୍ଠସ୍ୟ ହତଂ ପୁତ୍ରଶତଂ ରୁଷା ॥ମୁନିରପ୍ୟାହ ତତ୍ରାସୌ ବିଶ୍ୱାମିତ୍ରଃ ପ୍ରତାପବାନ୍ ।ସରସ୍ୱତୀମଥୈକାନ୍ତେ ବସିଷ୍ଠଂ ମେ ମହାପଗେ ।ସ୍ରୋତସା ମହତାକ୍ଷିପ୍ୟ ସ୍ନାୟମାନମିହାନୟ ॥ସୈବମୁକ୍ତା ତୁ ତଂ ଗତ୍ୱା ବସିଷ୍ଠଂ ପ୍ରାହ ଦୁଃଖିତା ।ଯଦୁକ୍ତବାଂସ୍ତୁ ଗାଧେୟଃ ସ ଚୋବାଚ ମହାନଦୀମ୍ ॥ଏବଂ କୁରୁ ମହାଭାଗେ ମାଂ ନୟସ୍ୱ ଯଥେପ୍ସିତମ୍ ।ମା ତେ କ୍ରୂରଃ ସ ଗାଧେୟଃ ଶାପଂ ଦଦ୍ୟାତ୍ସୁଦୁସ୍ତରମ୍ ॥ସନତ୍କୁମାର ଉବାଚ ।ଗାଧେୟସ୍ୟ ତତଃ ସା ତୁ ଜୁହ୍ୱତୋଽଗ୍ନିଂ ଦିବାକରେ ।ମଧ୍ୟଂ ପ୍ରାପ୍ତେଽନୟଦ୍ୱେଗାଦ୍ୱସିଷ୍ଠଂ ସ୍ରୋତସା ଶୁଭା ॥ତଂ ଦୃଷ୍ଟ୍ୱାପହୃତଂ ବ୍ୟାସ ସ୍ରୋତସା ମୁନିସତ୍ତମମ୍ ।ଉବାଚ ଚ୍ଛଦ୍ମନା ଯସ୍ମାଦ୍ୱେଗେନାପହୃତସ୍ତ୍ୱୟା ।ତସ୍ମାତ୍ତ୍ୱଂ କର୍ମଣାନେନ ସାସୃକ୍ତୋୟା ଭବିଷ୍ୟସି ॥ବିଶ୍ୱାମିତ୍ରେଣ ସା ଶପ୍ତା ନଦୀ ଲୋକସୁଖପ୍ରଦା ।ଅବହଦ୍ରୁଧିରଂ ଚୈବ ମାଂସମେଦସ୍ତଥୈବ ଚ ॥ଅଥ ତୀର୍ଥପ୍ରସଶ୍ଣ୍ଗେନ ମୁନିଭିଃ ସମୁପାଗତୈଃ ।ଅନୁଗ୍ରହଃ କୃତସ୍ତସ୍ୟା ଯେନ ସ୍ୱଚ୍ଛଜଲାଭବତ୍ ॥ମହତସ୍ତପସଃ ଶକ୍ତ୍ୟା କାଲେନ ମହତା ତଦା ।ବସିଷ୍ଠସ୍ୟ ଚ ତାଂ କ୍ଷାନ୍ତିଂ ଜ୍ଞାତ୍ୱା ସ ଋଷିପୁଙ୍ଗବଃ ॥ବିଶ୍ୱାମିତ୍ରୋ ମହାତେଜା ବସିଷ୍ଠେ ବୈରମତ୍ୟଜତ୍ ।ଏବଂ ତୌ ବୈରମନ୍ୟୋନ୍ୟଂ ଜହତୁର୍ମୁନିସତ୍ତମୌ ॥ସନତ୍କୁମାର ଉବାଚ ।ଯ ଇମଂ ଶୃଣୁୟାନ୍ନିତ୍ୟଂ ବ୍ରାହ୍ମଣାଞ୍ଛ୍ରାବୟୀତ ବା ।ସ ଦୁସ୍ତରାଣି ଦୁର୍ଗାଣି ତରତ୍ୟଶ୍ରାନ୍ତପୌରୁଷଃ ॥ହ୍ରୀପୌରୁଷୌଦାର୍ୟବିହାରସତ୍ତ୍ୱୈଃ ସମନ୍ୱିତଃ ସୋଜ୍ଜ୍ୱଲଚାରୁବେଷଃ ।ଭବେଚ୍ଚ ସର୍ୱାମରରାଜତୁଲ୍ୟସ୍ତ୍ରିପିଷ୍ଟପେ କ୍ରୀଡତି ଚେଚ୍ଛୟା ସ୍ୱୟମ୍ ॥ଏବଂ ତଦଭବଦ୍ୱ୍ୟାସ ବିଶ୍ୱାମିତ୍ରବସିଷ୍ଠୟୋଃ ।ବୈରଂ ସମାପ୍ତଂ ଲୋକାନାଂ ହିତାର୍ଥଂ ପୁନରେବ ଚ ॥ଇତି ସ୍କନ୍ଦପୁରାଣେ ଊନବିଂଶତିତମୋଽଧ୍ୟାୟଃ ॥ 19 ॥
Click Link 👇Next ଅଧ୍ୟାୟ
Comments
Post a Comment